Búgin Parlament Palatalarynyń birlesken otyrysyndaa Esep komitetiniń tóraǵasy Natalia Godýnova QR Úkimetiniń jáne respýblikalyq biýdjettiń atqarylýyn baqylaý jóninde esep berdi, dep habarlaidy Baq.kz agenttigi.
«Biyl biýdjettiń jalpyulttyq maqsattarǵa aýmaqtardy damytý boiynsha memlekettik baǵdarlamalar deńgeiinde qanshalyqty jaýap beretinin qaradyq. 2018 jyly respýblikalyq biýdjettiń atqarylýy ótken jylǵy Parlament pen Esep komitetiniń usynymdaryn eskere otyryp, Úkimet júrgizgen biýdjet protsesin aitarlyqtai qaita qurý aiasynda ótti. Esep komitetiniń Úkimetke jáne memlekettik organdarǵa bergen usynystarynyń sany boiynsha, biýdjettiń atqarylýyn qaraýdyń aldyńǵy qorytyndylary boiynsha oryndaý satysy 72 paiyzdy kórsetti. Bul biýdjettiń oryndalý jaǵdaiynyń jaqsarýyna yqpal etti. Biýdjet túzetýleri eki ese az boldy. Biýdjet qarajatyn tiimsiz paidalaný 4 ese tómendedi. Oń dinamika tirkeldi, sol sebepti bul jumys jalǵasady degen oidamyz», - dep aitty Godýnova eki palatanyń birlesen otyrysynda.
Sondai-aq, ol makroekonomikalyq kórsetkishterge de toqtaldy.
«Qazaqstan ekonomikasy álemdik ekonomikanyń ortasha ósý qarqyny men negizgi eksporttyq taýarlarǵa suranystyń birtindep qalpyna kelýi aiasynda damydy. Sonymen birge ekonomikany ártaraptandyrý saiasatyna qaramastan, ekonomika ósimine munai-gaz sektory burynǵysynsha aitarlyqtai úles qosyp otyr. Al onyń JIÓ qurylymyndaǵy úles salmaǵy 21,3% deiin ósti. Eksport qurylymyndaǵy mineraldy ónimderdiń úlesi 74% quraidy», - dep aitty Esep komitetiniń tóraǵasy.
Onyń aitýynsha, 2018 jyly áleýmettik salada da eleýli ózgerister bolyp, 2014 jyldan keiin byltyr alǵash ret halyqtyń eńbekaqysynyń naqty mánde ósýine qol jetkizildi. Godýnova bul oń úrdis biyl da jalǵasatynyn aitty. Al memlekettik jáne kvazimemlekettik sektor qaryzy JIÓ 60% aspaityn qaýipsiz deńgeide tur.
