Sýret: ashyq derekkóz
Mádeniet jáne aqparat ministrligi "Filmge prokattaý kýáligin berý qaǵidalaryn bekitý týraly" buiryqqa ózgeris engizbek, dep habarlaidy "Ult aqparat" Stan.kz aqparat agenttigine silteme jasap.
Buiryq jobasy "Ashyq NQA" saitynda jariialanǵan jáne 26 maýsymǵa deiin qoǵamdyq talqylaýda bolady.
Qazir filmdi prokatqa shyǵarý úshin ministrlikten prokattaý sertifikatyn alý jetkilikti. Jańa ózgeristerge sáikes filmdi prokatqa shyǵarý týraly sheshim ujymdyq túrde qabyldanady. Bul túzetý kinoteatrlarda kórsetiletin filmderdi baqylaýǵa alý maqsatynda engizilmek.
"Kinematografiia salasyndaǵy ýákiletti organnyń jazbasha ótinishi boiynsha kórsetiletin qyzmetti alýshy prokat kýáligin alý úshin filmin kórsetýi qajet. Kinoteatrǵa shyǵarý úshin shyǵarylǵan filmderdi qaraýdy quramynda ýákiletti organnyń, prezidenti ákimshiliginiń ókilderinen turatyn kinematografiia salasyndaǵy ýákiletti organnyń janynan qurylǵan komissiia júzege asyrady", – delingen buiryq jobasynda.
Sońǵy bes jyl ishinde ulttyq kinematografiiany qoldaý memlekettik ortalyǵy 103 jobany qarjylandyrsa, onyń 98-i aiaqtalyp, 23-i ǵana jaryqqa shyqqan, iaǵni biýdjet qarjysyna túsirilgen 75 film birde-bir ret jaryqqa shyqpaǵan.
Atalmysh 98 filmdi túsirýge biýdjetke 19 mlrd teńge bólingen. Al bul filmderdiń prokatynan túsken tabys bar-joǵy 1,5 mlrd teńgeni quraǵan.
Tek eki film ǵana kassada tabys tapqan: "Oflain demalys-2" (38 million biýdjetpen túsirilip, 90 million teńge jinady) jáne "Dos-Muqasan" (424 million teńgemen qarjymen túsirilip, prokattan túsken tabys 503 million teńgeni qurady).
"Qazaqstandyq kórermenderdiń áli kúnge deiin keibir filmderdi kórmeýiniń sebebi – prodiýserler men avtorlardyń prokatqa qyzyǵýshylyq tanytpaýy, óitkeni olar jobalardy júzege asyrý kezinde-aq óz qalamaqysyn alyp alady", – delingen mádeniet jáne aqparat ministrliginiń 2024 jyldyń aqpanyndaǵy habarlamasynda.
Eske salsaq, buǵan deiin "Qazaqfilmniń" vitse-prezidenti 5 jylǵa sottalǵany týraly jazǵan edik.
