Foto: elements.envato.com
2022 jylǵy respýblikalyq biýdjettiń atqarylýy týraly esepke sáikes, memlekettik organdar 81 mlrd teńgeni igermegen. Bul týraly vitse-premer – qarjy ministri Erulan Jamaýbaev málimdedi, dep habarlaidy Sputnik Qazaqstan.
Onyń aitýynsha, ótken jyldyń qorytyndysy boiynsha biýdjet shyǵystary 98,6%-ke atqaryldy jáne 18,5 trln teńgeni qurady.
"262 mlrd teńge atqarylmady. Onyń ishinde 181 mlrd teńge – bul úkimet rezervi boiynsha únemdelgen aqsha jáne ózge de únemdeý. Biýdjet kodeksine sáikes bul shyǵystar igerilmegen dep eseptelmeidi. Sondyqtan taza igerý 99,6%-ti qurady dep aitýǵa bolady. Igerilmegeni – 81 mlrd teńge", - dedi Jamaýbaev Májiliste 2022 jylǵy respýblikalyq biýdjettiń atqarylýy týraly esepti tanystyryp.
Ministrdiń aitýynsha, biýdjet aqshasyn igermeýge ónim berýshilerdiń shart talaptaryn buzýy, jobalaý-smetalyq qujattamaǵa memlekettik saraptamanyń uzaq ótýi nemese oń qorytyndysynyń bolmaýy, oryndalǵan jumys aktileriniń, shot-faktýralardyń ýaqtyly usynylmaýy sebep bolǵan.
"Jyl sońynda respýblikalyq biýdjette eleýli kassalyq qaldyqtar qalyptasty. Osy qaldyqtar esebinen biz biylǵy biýdjetti qarjylandyrýǵa múmkindik aldyq. Jalpy respýblikalyq biýdjetten 39 memlekettik organ qarjylandyryldy, olar boiynsha 2054 tikelei nátije kórsetkishi jáne 474 túpkilikti nátije kórsetkishi bekitilgen bolatyn. Biýdjetti atqarý nátijesinde kórsetkishterdiń shamamen 90%-ne qol jetkizildi", - dedi vitse-premer.
2022 jyly 217 mlrd teńge biýdjet qarajaty tiimsiz paidalanylǵan.
"Bul Joǵary aýditorlyq palatanyń jáne tekserý komissiialarynyń aýditorlyq is-sharalaryn esepke almaǵandaǵy kórsetkish", - deidi Jamaýbaev.
Ótken jyldyń qorytyndysy boiynsha biýdjet qarajatyn tiimsiz paidalanǵany úshin ortalyq jáne jergilikti atqarýshy organdardyń 113 qyzmetkeri tártiptik jaýapkershilikke tartylǵan, sonyń ishinde 82 adam basshylyq qyzmet atqarady.
