Foto Depositphotos.com
Qytailyq avtoóndirýshi BYD óziniń tarihyndaǵy eń aýqymdy keri shaqyrtý naýqanyn jariialady — 2015 jyldan 2022 jylǵa deiin shyǵarylǵan Tang jáne Yuan Pro seriiasyndaǵy 115 myńnan astam kólik servistik tekseriske jiberiledi. Bul týraly 17 qazanda Qytaidyń Naryqty retteý jónindegi memlekettik basqarmasy habarlady.
2015–2017 jyldary shyǵarylǵan BYD Tang kólikteriniń bir bóliginde elektrqozǵaltqyshty basqaratyn elektrondy bloktaǵy aqaý anyqtalǵan. Sirek jaǵdailarda kontroller zariadty durys taratpai, basqarý taqshasy qyzyp ketýi múmkin. Sonyń saldarynan kólik elektr rejiminde qozǵalý múmkindigin joǵaltady. Bul táýekeldiń aldyn alý úshin BYD baǵdarlamalyq jasaqtamany jańartýdy josparlap otyr — endi júie akkýmýliatordy qaýipsiz tásilmen, tikelei elektromotor arqyly razriadtaityn bolady.
2021–2022 jyldary shyǵarylǵan Yuan Pro modelderinde akkýmýliator blogynyń tyǵyzdaǵyshtary keide durys ornatylmaǵany belgili boldy. Sonyń saldarynan germetikalyq jabylý deńgeii tómendeýi múmkin. Eger kólik uzaq ýaqyt boiy sýdan joǵary jyldamdyqpen ótse, akkýmýliator ishine ylǵal ený qaýpi bar, bul qýattyń tómendeýine jáne elektrjúieniń isten shyǵýyna ákeledi.
Mundai kólikterde óndirýshi akkýmýliator qorabyn qosymsha germetikpen nyǵaityp, sý ótkizbeý qorǵanysyn qalpyna keltiredi.
Buǵan deiin BYD otqa tutaný qaýpine bailanysty Fangchengbao Bao 5 gibridti jol talǵamaityn kólikteriniń 6843 danasyn, sondai-aq rýldik basqarý blogyndaǵy aqaýǵa bailanysty Dolphin jáne Yuan Plus úlgisindegi shamamen 97 myń elektromobildi keri shaqyrǵan bolatyn.
