Ótken túnde Jambyl oblysynyń Qordai aýdanynda quqyqtyq tártipti buzý faktileri tirkelgen joq. Jaǵdai turaqtaldy, aýyldyqtardyń ómiri qalypty arnasyna túsýde.
Úkimet komissiiasy jumysynyń ekinshi kúnin aýyldar men shekara mańy ótkizý pýnktterin aralaýdan bastady.
«Qarasý» shekara beketinde adamdar joq, al Qyrǵyzstannan kelgen adamdar kezegi «Aýqatty» pýnktinde paida bolǵan. Bular - osyǵan deiin kórshiles respýblikaǵa ketip qalyp, endi úilerine oralyp jatqan qazaqstandyqtar. Olardyń ishinde áielder men balalar kóp.
Berdibek Saparbaev otandastarymyzdan sabyrlyq saqtap, arandatýlardyń yqpalynda ketpeýdi surady.
«Sizderden arandatýlarǵa ermeýdi suraimyz. Buzylǵan barlyq úidi biz qalpyna keltiremiz, otbasylarǵa kómek kórsetemiz. Bizdiń mamandar jumys istep jatyr, zalaldy baǵalaýda. Bizdiń barlyǵyńyzǵa taǵy aitarymyz, ketip qalǵan, qazir Qyrǵyzstanda óz týystaryn panalap jatqan jaqyn-jýyqtaryńyzǵa elge qaitý kerektigin jetkizseńizder», - dedi B. Saparbaev ótkizý pýnktinde jinalǵan qaýymǵa.
B. Saparbaev aýdandaǵy jaǵdaidyń turaqtalǵanyna sendirdi.
«Prezident tapsyrmasy boiynsha munda arnaiy Úkimet komissiiasy keldi, onyń quramynda memlekettik jáne quqyq qorǵaý organdarynyń basshylary bar. Ótken táýlikte eshqandai oqiǵa da, quqyq buzýshylyq ta bolǵan joq. Jaǵdai turaqtaldy. Quqyq qorǵaý organdarynyń kúshiniń arqasynda tártip pen qaýipsizdik ornatyldy. Taǵy da sizderden arandatýlarǵa ilespeýdi suraimyz», - dedi B. Saparbaev.
Aita keteiik, elge oralyp jatqan qazaqstandyqtar shekaradan jeńildetilgen rejimde ótedi.
