12 qazanda Qyrǵyzstan syrtqy ister ministri Chingiz Aidarbekov BUU-nyń Ortalyq Aziia boiynsha arnaiy ýákili Natalia Germanmen telefon arqyly sóilesti.
German Qyrǵyzstandaǵy jaǵdaidy beibit túrde sheshýge shaqyryp, Sooronbai Jeenbekovti eldiń zańdy prezidenti, konstitýtsiialyq biliktiń zańdy ókili dep ataǵan.
BUU "Prezident barlyq saiasi kúsh pen halyqtyń basym bóliginiń, onyń ishinde azamattyq qoǵam men jastardyń qoldaýymen quqyq aiasynda memleketti tyǵyryqtan shyǵaratyn jol tabar dep úmittenedi" delingen Qyrǵyzstan SIM habarlamasynda.
Vedomstvonyń málimdeýinshe, BUU bas hatshysy Gýterrish Qyrǵyzstandaǵy jaǵdaidy muqiiat baqylap otyr jáne buǵan deiin jasaǵan málimdemelerinde aitqanyndai, Qyrǵyzstandy konstitýtsiialyq protsess aiasynda daǵdarystan shyǵarýǵa, parlament sailaýyn uiymdastyrý jáne eldiń ekonomikalyq turaqtylyǵyn tez arada qalpyna keltirýge atsalysýǵa daiyn ekenin bildirgen.
Qyrǵyzstanda 4 qazanda ótken parlament sailaýynan keiin saiasi kúshter Bishkektegi "Ala-Too" alańynda narazylyq aktsiiasyn bastaǵan. Parlament sailaýynyń nátijesin joiýdy talap etken narazylyq aktsiialarynyń sońy tártipsizdikke ulasqan. 6 qazanǵa qaraǵan túni demonstranttar parlament pen prezident apparaty ornalasqan "Aq úidi" basyp aldy.
Sol kúni narazylar talabynan keiin túrmedegi birneshe saiasatker qamaýdan shyqty. Olardyń arasynda burynǵy prezident Almazbek Atambaev, burynǵy depýtat Sadyr Japarov ta boldy.
10 qazanda Japarov premer-ministr qyzmetine bekitilgen. Keibir depýtattar onyń qyzmetke taǵaiyndalýynyń legitimdigine kúmán keltirgen.
Qyrǵyzstanda saiasi kúshter daǵdarystan shyǵý joldaryn áli talqylap jatyr. 9 qazanǵa qaraǵan túni Sooronbai Jeenbekov "memleket quqyqtyq aiaǵa oralǵan soń prezident qyzmetinen ketýge daiarmyn" dep málimdegen.
