Jasandy intellektiniń qarqyndy damýyna bailanysty onyń yqtimal qaýipterin baqylaý máselesi halyqaralyq kún tártibine shyqty. BUU Bas hatshysy Antoniý Gýterrish memleketterdi JI-di damytýǵa ortaq qaýipsizdik erejelerin engizýge shaqyrdy, dep habarlaidy ult.kz «24KZ»-ke silteme jasap.
Gýterrishtiń aitýynsha, jasandy intellektini qaýipsiz ári jaýapty damytý úshin halyqaralyq yntymaqtastyq qajet. Bul másele Niý-Iorkte ótetin BUU Bas Assambleiasynyń kún tártibindegi negizgi taqyryptardyń birine ainalmaq.
«Bizge jasandy intellektini qaýipsiz, senimdi jáne jaýapty damytý joldaryn ortaq túsiný qajet. Bul adal halyqaralyq yntymaqtastyq pen úilestirilgen jahandyq kúsh-jigerdi talap etedi», – dedi BUU Bas hatshysy.
BUU sarapshylaryn alańdatyp otyrǵan máselelerdiń biri – tsifrlyq tehnologiialar men orasan zor derekterdiń az ǵana elder men iri tehnologiialyq kompaniialardyń qolynda shoǵyrlanýy. Uiym mundai jaǵdaida jasandy intellektiniń belgili bir toptardyń múddesine paidalanylý qaýpin atap ótti.
Bul máselege tehnologiia salasynyń ókilderi de nazar aýdaryp otyr. Anthropic kompaniiasynyń basshysy Dario Amodei qýatty neirojúielerdi ázirleý qarqynyn báseńdetýge shaqyrdy. Onyń pikirinshe, JI-diń damý jyldamdyǵy qaýipsizdik sharalarynyń engizilýinen ozyp barady.
Amodei avtonomdy JI-agentteri jaqyn arada aýqymdy ekonomikalyq ziian keltirýi múmkin ekenin aitqan. Onyń usynysyn OpenAI negizin qalaýshy Sem Altman, Google DeepMind basshysy Demis Hassabis jáne Ilon Mask ta qoldaǵan.
Microsoft AI basshysy Mustafa Sýleiman da JI-ge tolyq avtonomiia berýdiń yqtimal saldaryna nazar aýdardy. Onyń pikirinshe, adamdar ózdiginen maqsat qoia alatyn, qarjy basqaryp, aktivterge ielik etetin júielerdi jasasa, olar resýrstar úshin adamzatpen básekelesýi múmkin.
Sonymen qatar AQSh-ta JI salasyndaǵy tehnologiialyq básekelestik jalǵasyp jatyr. AQSh prezidenti Donald Tramp jasandy intellektiniń damýyn shekteitin qatań retteýge qarsy ekenin aityp, elde «Jasandy intellekt kúshterin» qurý josparyn jariialaǵan.
Al AQSh pen Qytai JI máseleleri boiynsha dialogty jalǵastyrýǵa kelisti. Taraptar ulttyq qaýipsizdikke qaýip tóndirýi múmkin oqiǵalar týraly habarlaý tetigin qurýdy josparlap otyr. Alaida onyń naqty jumys tártibi ázirge belgilenbegen.
