BUU Ýkrainanyń shyǵysyndaǵy Reseige arqa súieitin separatisterdiń baqylaýyndaǵy aýmaqta qamaýda ustap otyrǵan tutqyndardy azaptaý men olarǵa qatygezdik kórsetý – kún saiyn bolatyn qubylysqa ainalǵan degen aqpar taratty. 9 shildede BUU-yń Adam quqyqtary jónindegi Joǵarǵy komissarynyń orynbasary Nada Ál-Nashif Donetskidegi "Izoliatsiia" túrmesinde jáne Ýkrainanyń shyǵysyndaǵy separatister basqaratyn bólikterdegi ózge de qamaý oryndarynda adam quqyqtary "óreskel aiaqqa taptalatynyn" málimdedi.
Jenevada ornalasqan BUU-nyń Adam quqyqtary jónindegi keńesiniń otyrysynda Nashif Ýkrainanyń shyǵysyndaǵy adamdardy tutqyndaý, azaptaý jáne olarǵa qatygezdikpen qaraý, sonymen birge Qyrymdaǵy adam quqyqtary ahýaly týraly baiandamasyn oqyǵan edi. Ol Ýkrainanyń shyǵysynda zań buzý "kún saiyn jáne júieli túrde jalǵasyp kele jatqanyn" aitty.
Adam quqyqtary jónindegi Joǵarǵy komissardyń orynbasary Ýkrainanyń shyǵysynda qaqtyǵys bastalǵannan beri qamaý alynǵan shamamen 4000 tutqynnyń úkimet kúshteriniń baqylaýyndaǵy territoriiada da, separatister basqaratyn aýmaqta da tutqyndar azaptalatyny nemese olarǵa qatygezdik tanytatyny jaily aitty.
Nashif qaqtyǵystyń alǵashqy kezeńinde qolǵa túsken azamattardyń azaptaý men qatygezdikten kóz ashpaǵanyna, ýaqyt óte kele, ásirese úkimet baqylaýyndaǵy aimaqtarda mundai jaittardyń azaiǵanyna nazar aýdardy. Úkimet baqylaýyndaǵy aimaqtarda "2016 jyldyń aiaǵynan bastap qaqtyǵys sebebinen zańsyz tutqyndalǵandardy uzaǵyraq, birneshe kúnnen astam qamaýda ustaý jaittary aitarlyqtai azaidy" dedi ol.
Biraq reseishil separatister baqylaýyndaǵy aýmaqta "basym kópshiligi" qaqtyǵystarǵa bailanysty ustalǵan tutqyndardy zańsyz qamaýda ustaý áli de jalǵasyp otyr" dedi baiandamashy.
Buǵan qosa Nashif Reseidiń Qyrymda adam quqyqtary týraly halyqaralyq zańdar men halyqaralyq gýmanitarlyq zańdardyń erejelerin únemi buzyp otyrǵanyn aitty.
