Human Rights Watch (HRW) adam quqyǵyn qorǵaý uiymy Ózbekstandy BUU-nyń azaptaýǵa qarsy komiteti usynǵan keńesterin oryndaýǵa shaqyrdy. Jeltoqsan aiynyń basynda BUU-nyń azaptaýǵa qarsy komiteti Ózbekstanda "azaptaýdyń keńinen taralǵan, qalypty jaǵdai" retinde qalyp otyrǵanyn aityp, Tashkentti "azaptaý men qatygezdikti joiýǵa" úndegen.
10 jeltoqsanda taraǵan málimdemede HRW Ózbekstannyń halyqaralyq áriptesterin ózbek úkimetiniń aldynda komitet aitqan máseleni qozǵaýǵa jáne osy máselelerdiń sheshilýine qarai Ózbekstanmen tyǵyz qarym-qatynas ornatýǵa shaqyrǵan.
"Ózbekstan bul sumdyq tájiribeni túpkilikti joiý úshin jyldam shara qoldanýy tiis" dedi Human Rights Watch uiymynyń Eýropa jáne Ortalyq Aziia elderi boiynsha direktory Hiý Ýiliamson.
BUU komiteti jaqynda jariialaǵan Ózbekstannyń Azaptaýǵa qarsy konventsiia sharttaryn oryndaýy jaily sholýynda "2017-2018 jyldar aralyǵynda prokýratýraǵa azaptaý boiynsha kelip túsken aryz-shaǵymdar on ese kóbeigen" dep jazylǵan. Komitet ókilderi biraq soǵan qaramastan "azaptaýǵa bailanysty aiyptalǵan laýazymdy tulǵalar sany sol kúiinshe qalǵanyna" alańdaǵan. Uiym sholýda ol jaily naqty málimet keltirmegen. BUU-nyń azaptaýǵa qarsy komiteti sonymen birge túrmede azaptaýǵa ushyrap, kóz jumǵan sottalýshylar jaily málimetterge de alańdap otyrǵanyn jetkizgen.
Mamyr aiynda Human Rights Watch uiymy "Biraz jetistigine qaramastan Ózbekstan avtoritarlyq elder qatarynan shyqpady. Qaýipsizdik qyzmetiniń ókileti áli de kúshti. Adamdardy zańsyz ustaý, qinaý, qamaýda otyrǵandardy azaptaý týraly habarlar áli de túsip jatyr" dep málimdegen edi.
Ózbekstandy 27 jyl basqarǵan Islam Karimov 2016 jyly qyrkúiekte 78 jasynda qaitys bolǵan. Keiin elde ótken sailaýda jeńiske jetken Mirziiaev 14 jeltoqsanda prezident qyzmetine kiristi. HRW byltyr Mirziiaev kórshiles eldermen yntymaqtastyqty kúsheitip, eldegi adam quqyqtarynyń ahýalyn jaqsartýda úlken qadam jasaǵanyn aitqan.
