Qaýipsizdik Keńesiniń tyǵyz jumys kestesi týraly BUU-nyń Jańalyqtar qyzmetinde uiymnyń tóraǵasy, BUU-daǵy Qazaqstannyń turaqty ókili Qairat Omarov aityp berdi, dep habarlaidy "Ult aqparat" BUU Jańalyqtar ortalyǵyna silteme jasap.
Osy aida ótetin Qaýipsizdik Keńesiniń otyrysyna Qazaqstan Prezidenti Nursultan Nazarbaev, QR Syrtqy ister ministri Qairat Ábdirahmanov jáne onyń reseilik áriptesi Sergei Lavrov pen ózge de resmi ókilder qatysatyn bolady.
«Áý basta, biz Qaýipsizdik Keńesiniń turaqty emes múshesi bolyp júrgen kezimizde, ár túrli elderdi búgingi kúngi ózekti máseleleri sheshimi tabylatyn ortaq platformaǵa biriktirý, ymyraly nusqany izdeýshi el retinde óz rólimizdi belgilep qoidyq», - deidi Qairat Omarov.
Qaýipsizdik Keńesindegi Qazaqstannyń basym ustanymy Qazaqstan Prezidentiniń BUU Qaýipsizdik Keńesine joldaǵan «Qaýipsiz, ádil jáne órkendegen álem qurý úshin jahandyq áriptestikti nyǵaitý jónindegi Qazaqstannyń tujyrymdamalyq kózqarasy» saiasi úndeýinde de tujyrymdalyp, belgilengen bolatyn.
«Qazaqstan Prezidentiniń saiasi úndeýi Qaýipsizdik Keńesiniń resmi qujatyna ainalyp, Keńes múshelerine taratyldy. Sondyqtan, biz búgin dál osy basymdyqtardy ustanamyz», - dedi Qairat Omarov qańtar aiynda.
Qazaqstannyń bastamasymen BUU-nyń tarihynda Qaýipsizdik Keńesiniń sailanǵan turaqty emes alty múshesiniń týyn tuńǵysh ret saltanatty túrde kóterý rásimi uiymdastyrylǵan.
«Biz BUU-nyń jańa dástúrin bastap berýge tyrystyq. Meniń oiymsha, munyń simvolikalyq turǵyda mańyzy tereń, sebebi Qaýipsizdik Keńesiniń músheligine sailaný turaqty negizde bolmasa da, ol - úlken qurmet, jaýapkershilik pen artylǵan úlken senim», - deidi ol.
Qazaqstan úshin mańyzdy úsh shara ótkeli jatyr. Atap aitqanda, 18 qańtarda jappai qyryp-joiýǵa arnalǵan qarýlardy taratpaý jáne senim sharalary taqyrybynda joǵarǵy mazmundy tematikalyq debat ótkizý josparlanǵan. Atalǵan otyrysta QR Prezidenti Nursultan Nazarbaev tóraǵalyq etetin bolady. Kútilip otyrǵanyndai, ol jiynǵa basqa elderdiń memleket basshylary men syrtqy ister ministrleri qatyspaq.
«Biz qaqtyǵystardyń aldyn alý jáne beibitshilikti saqtaý máselelerin talqylaityn bolamyz. Bul taqyryp Memleket basshysynyń «Manifest. Álem. HHI ǵasyr» ataýly baǵdarlamalyq qujatymen, sonymen qatar teń quqyqtyq jáne ózara tiimdi seriktestik qaǵidattaryna negizdelgen basym baǵyttarmen, halyqaralyq quqyqty ustaný jáne syilaýmen, diplomatiialyq jol arqyly kez kelgen qaqtyǵysty sheshý jolymen dálme-dál úndesedi», - deidi Qairat Omarov.
Úlken taqyryptyń ekinshisi - ózara táýeldilik, qaýipsizdik pen damý modeli boiynsha Aýǵanstan men Ortalyq Aziiada aimaqtyq yntymaqtastyq ornatý. Qazaqstan atynan bul turǵyda syrtqy ister ministri Qairat Ábdirahmanov qatysyp, atalǵan sharaǵa tóraǵalyq etpek. Ol jiynǵa Aýǵanstan men Ortalyq Aziia elderiniń syrtqy ister ministrleri qatysady dep kútilýde.
«18 jáne 19 qańtarda ótetin eki sharada da negizgi baiandamashy retinde BUU Bas hatshysy Gýterrish sóz sóileitin bolady. Biz sonymen birge, ol otyrystarǵa Reseidiń syrtqy ister ministri Lavrov ta qatysady dep kútýdemiz», - deidi Omarov.
Sonymen birge, 25 qańtarda Taiaý Shyǵys jáne Palestina máselesine qatysty taqyryptar boiynsha toqsanaralyq ashyq debat uiymdastyrý kózdelgen.
«Biz úshin basty baǵyttardyń biri, ol álbette, Astana protsesi, Siriia máselesi jónindegi kelissózder», - degen BUU-daǵy Qazaqstannyń turaqty ókili bul baǵytta barynsha kúsh salyp jatqan memleketterge alǵysyn bildirdi.
«Astana protsesine qatysyp otyrǵan negizgi memleketter - Resei, Túrkiia men Iran. Sonymen birge, Amerika Qurama Shtattary men Iordaniia tarapynan bastamalar bar, olar da bul máseleni retke keltirýde kómek berýge tyrysyp jatyr. Budan basqa da alańdar, máselen, Máskeýlik alań, Kabýl protsesi, Ystanbul protsesi bar. Sonymen qatar, álbette, Jenevalyq alańnyń jumysy qarqyndy - Astanalyq jáne Jenevalyq alań birin-biri ózara tolyqtyrý negizinde jumys istep jatyr», - deidi Qaitar Omarov.
Qazaqstannyń tóraǵalyǵy barysynda taǵy bir basymdyq belsendi túrde talqylanatyn bolady - ol Afrikadaǵy máseleler. Afrikalyq qurlyqqa qatysty suraqtar men barlyq bitimgerlik áreketter qarastyrylady.
