Birikken Ulttar Uiymynyń adam quqyqtary jónindegi keńesi Resei áskeri Kiev oblysynan ketken soń bul aimaqta myńdaǵan máiit tabylǵanyn habarlady. Keńes muny áskeri qylmys dep esepteidi.
BUU-nyń adam quqyqtary jónindegi joǵarǵy komissary Mishel Bachelet Resei áskeri Ýkrainanyń Kiev oblysynan ketken soń munda myńdaǵan máiit tabylǵanyn, bul jaǵdaidy áskeri qylmysqa jatqyzýǵa bolatynyn málimdedi. "Kievtiń soltústigindegi aýdandardyń turǵyndaryn jappai qyrǵanyn qosa eseptesek, qyrǵynǵa ushyraǵan aimaqtar kóp ekeni shoshytady", - dedi Bachelet keńeste daýys berý qarsańynda jasaǵan baiandamasynda.
Keńeste Resei áskeriniń Kiev oblysyndaǵy eldi mekender men qalalardy basyp alǵanda bolǵan oqiǵalardy halyqaralyq tergeý máselesi talqylandy.
Kiev oblysy Resei basqynshylarynan azat etilgen soń, 2 sáýirde qalalar men aýyldarda beibit turǵyndardyń máiiti kóptep tabyla bastady. Astana túbindegi Býcha qalasynda kem degende 400 adamdy óltirgeni anyqtaldy.
Máskeý Ýkrainada "beibit turǵyndardy jappai qyrý" derekterin joqqa shyǵaryp otyr.
Alaida Resei áskerileriniń beibit turǵyndardy jappai qyrǵany qujattar men kýáger sózimen ǵana emes, spýtnikten túsirilgen sýrettermen jáne beinebaqylaý kameralarymen de rastalyp otyr.
