BUU Bas Assambleiasy sársenbi kúni 2021-2022 jyldardaǵy Qaýipsizdik Keńesiniń turaqty emes bes jańa múshesin sailandy, dep habarlaidy "Ult aqparat".
Daýys berý nátijesi boiynsha Úndistan men Meksika tiisinshe 184 jáne 187 qajetti daýys jinady.
Batys elderi tobynyń arasynda Norvegiia men Irlandiia sáikesinshe 130 jáne 128 daýys jinap, jeńiske jetti.
Eń kúrdeli diplomatiialyq tartys Afrika elderi arasynda boldy. Munda jeńimpaz daýys berýdiń ekinshi kezeńinde anyqtalady. Óitkeni kandidattardyń eshqaisysy, atap aitqanda Keniia men Djibýti (sáikesinshe 113 jáne 78 daýys) tiisti daýysty jinai almady. Eske sala keteiik, Qaýipsizdik keńesiniń turaqty emes músheligine ótý úshin kandidattar Bas assambleia delegattarynyń 2/3 daýysyn jinaýy tiis.
Ádette BUU Qaýipsizdik Keńesiniń turaqty emes múshelerin sailaý bir kún ǵana ótkiziledi. Biraq bul joly koronavirýske bailanysty BUU kúnine bir-aq ret daýys berýdi uiǵardy. Osylaisha, BUU Qaýipsizdik Keńesiniń turaqty emes músheleriniń besinshi jańa múshesi erteń anyqtalady.
COVID-19 qaýpine bailanysty BUU Bas Assambleiasy óz tarihynda eń erekshe daýys berý rásimin ótkizdi. Ár elden kelgen delegattar Bas Assambleianyń bos turǵan zalyna bir-birden maskamen kirip, sodan keiin daýys berip, birden BUU shtab-páterinen shyǵyp ketti.
