BUU bas hatshysy Antoniý Gýtterish Qytai jetekshisi Si Tszinpinmen kezdesip, Shyńjańdaǵy musylmandardyń jaǵdaiyn talqylady. Kezdesýde Gýtterish Qytai biligin adam quqyǵyn saqtaýǵa shaqyrǵan. Bul týraly 29 sáýirde BUU baspasóz hatshysy Stefan Dýdjarich habarlady.
Gýtterish Si Tszinpinmen áńgimede "terrorizm men ekstremizmmen kúres jaǵdaiynda da adam quqyǵy tolyq saqtalýy kerek" degen. Kezdesý 26 sáýirde Pekinde ótken.
Osyǵan deiin Human Rights Watch uiymynyń atqarýshy direktor Kennet Rot amerikalyq Washington Post gazetine maqala jariialap, Gýtterishti "adam quqyǵy máselesi jaily aýyz ashpai otyr" dep aiyptady. Osydan keiin BUU baspasóz qyzmeti Gýtterish pen Si Tszinpin kezdesýi týraly habarlama taratty.
2017 jyldan bastap halyqaralyq uiymdar Qytai biligin Shyńjańdaǵy musylmandardy qýdalap jatyr dep aiyptap keledi. Qytai úkimeti basynda bul ortalyqtardyń baryn joqqa shyǵarǵan. Keiin Pekin Shyńjańdaǵy saiasatyn "ekstremizmge qarsy shara" dep atap, adamdar erkinen tys otyrǵan lagerlerdi "til úirenip, kásipke baýlityn " ortalyqtar dep túsindirgen.
Quqyq qorǵaýshylar men lagerde bolǵan azamattar bul ortalyqtardyń bilim berý mekemesinen góri túrmege uqsaitynyn, onda otyrǵan adamdarǵa qysym jasalatynyn aitqan.
