بۇۇ باس حاتشىسى انتونيۋ گۋتتەريش قىتاي جەتەكشٸسٸ سي تسزينپينمەن كەزدەسٸپ, شىڭجاڭداعى مۇسىلمانداردىڭ جاعدايىن تالقىلادى. كەزدەسۋدە گۋتتەريش قىتاي بيلٸگٸن ادام قۇقىعىن ساقتاۋعا شاقىرعان. بۇل تۋرالى 29 سەۋٸردە بۇۇ باسپاسٶز حاتشىسى ستەفان دۋدجاريچ حابارلادى.
گۋتتەريش سي تسزينپينمەن ەڭگٸمەدە "تەرروريزم مەن ەكسترەميزممەن كٷرەس جاعدايىندا دا ادام قۇقىعى تولىق ساقتالۋى كەرەك" دەگەن. كەزدەسۋ 26 سەۋٸردە پەكيندە ٶتكەن.
وسىعان دەيٸن Human Rights Watch ۇيىمىنىڭ اتقارۋشى ديرەكتور كەننەت روت امەريكالىق Washington Post گازەتٸنە ماقالا جارييالاپ, گۋتتەريشتٸ "ادام قۇقىعى مەسەلەسٸ جايلى اۋىز اشپاي وتىر" دەپ ايىپتادى. وسىدان كەيٸن بۇۇ باسپاسٶز قىزمەتٸ گۋتتەريش پەن سي تسزينپين كەزدەسۋٸ تۋرالى حابارلاما تاراتتى.
2017 جىلدان باستاپ حالىقارالىق ۇيىمدار قىتاي بيلٸگٸن شىڭجاڭداعى مۇسىلمانداردى قۋدالاپ جاتىر دەپ ايىپتاپ كەلەدٸ. قىتاي ٷكٸمەتٸ باسىندا بۇل ورتالىقتاردىڭ بارىن جوققا شىعارعان. كەيٸن پەكين شىڭجاڭداعى ساياساتىن "ەكسترەميزمگە قارسى شارا" دەپ اتاپ, ادامدار ەركٸنەن تىس وتىرعان لاگەرلەردٸ "تٸل ٷيرەنٸپ, كەسٸپكە باۋليتىن " ورتالىقتار دەپ تٷسٸندٸرگەن.
قۇقىق قورعاۋشىلار مەن لاگەردە بولعان ازاماتتار بۇل ورتالىقتاردىڭ بٸلٸم بەرۋ مەكەمەسٸنەن گٶرٸ تٷرمەگە ۇقسايتىنىن, وندا وتىرعان ادامدارعا قىسىم جاسالاتىنىن ايتقان.
