BUU Bas hatshysy úkimetterdi de, qarapaiym adamdardy da burynǵy qatelikterden sabaq alyp, adamdardyń ómiri úshin jaýapkershilikti moinyna alý qajettigin aitty.
Ol úshin adamdar bir-birimen yntymaqtasyp, ǵalymdardy tyńdaý, teris aqparat taratpaý, qashyqtyqty saqtaý, maska taǵý jáne qol jýý siiaqty talaptardy múltiksiz oryndaýy kerek.
Bul týraly BUU Jańalyqtar ortalyǵy habarlady.
DDSU málimetinshe, koronavirýs infektsiiasynan qaitys bolǵandardyń sany million adamnan asqan.
«Biz qorqynyshty shekten asyp kettik: COVID-19 pandemiiasy million adamnyń ómirin qiyp ketti. Bul san úrei týdyrady. Bul - bireýdiń ákesi men anasy, áieli men eri, aǵasy men ápkesi, dosy jáne áriptesi», - dedi Gýterrish.
«COVID-19 milliondaǵan adamnyń ómirin ózgertip qana qoimai, dúniege kelgen kúnin atap ótýge nemese qymbatty adamdarymyzdy sońǵy saparǵa shyǵaryp salý múmkindiginen aiyrdy» - dep atap ótti BUU basshysy.
«Pandemiianyń sońy kórinbeidi», - dep eskertti Bas hatshy. Bul adamdar áli de jumystan aiyrylyp, bilim alýdan qol úzetinin, qalypty ómirge orala almaitynyn bildiredi.
Sonda da bolsa, Antoniý Gýterrish bizdiń virýsty jeńip shyǵa alatynymyzǵa senimdi.
Onyń aitýynsha, kóshbasshylardyń jaýapkershiligi, ǵylymi qadam, yntymaqtastyq pen senimdi aqparat búginde erekshe mańyzdy.
«Vaktsinany daiyndaý jumystary júrgizilgenshe, adamdardyń ómirin qutqarý úshin qoldan keletinniń bárin jasaiyq: fizikalyq qashyqtyqty saqtap, maska taǵyp, qol jýaiyq», - dep úndedi Bas hatshy.
