Aýǵanstanda 2020 jyldyń alǵashqy jartysynda 1 282 beibit turǵyn qaza bolǵan. Olardyń 340-y - bala. Buǵan qosa, 2 176 beibit turǵyn (arasynda 727 bala bar) jaraqattanǵan. Birikken Ulttar Uiymynyń Aýǵanstan boiynsha missiiasynyń (UNAMA) 27 shilde kúni jariialaǵan esebinde osyndai málimet aitylady.
- Soǵys qimyldary kún saiyn beibit turǵyndarǵa adam shoshyrlyq ziian keltirip jatyr, al Aýǵanstan úkimeti men tálipterdiń kelissóz ústeline otyrýǵa tarihi múmkindikteri bar, - dedi BUU bas hatshysynyń Aýǵanstan jónindegi arnaiy ókili Debora Laions.
Kisi óliminiń 58 paiyzy úkimetke qarsy kúshter - «Talibannan» bastap ekstremistik «Islam memleketi» uiymy men belgisiz sodyr toptar moinyna júkteledi dep kórsetilgen. Adam óliminiń kóbeiýine Aýǵanstan úkimet kúshteriniń áreketi de yqpal etken (23 paiyzyna jaýapty). Esepte byltyrǵy jyldyń osy kezeńimen salystyrǵanda adam ólimi men jaraqattaný jaǵdaiy 13 paiyzǵa azaiǵany aitylǵan.
Aýǵanstanda beibitshilik ornatý talpynystary sátsizdikke ushyrap, Kabýl men tálipter arasynda tutqyndar almasý boiynsha qarama-qaishylyqtar órshigen sátte osyndai baiandama jaryq kórip otyr. AQSh beibitshilik protsesine yqpal etý úshin Aýǵanstan jónindegi arnaiy ýákilin bes elge jibergen.
25 shildede jaryq kórgen AQSh memlekettik departamentiniń málimdemesinde AQSh-tyń Aýǵanstan jónindegi arnaiy ýákili Zalmai Halilzadtyń Doha, Islamabad, Kabýl, Oslo jáne Sofiiaǵa baratyny jazylǵan.
