Buryn sybailas jemqorlyq qylmysyn jasaǵan adamdardy jumysqa qabyldaǵany úshin memlekettik organnyń nemese ulttyq kompaniianyń basshysy óz qaltasynan 100 AEK kóleminde aiyppul tóleidi, - dep habarlaidy QazAqparat.
Bul jóninde QR Sybailas jemqorlyqqa qarsy is-qimyl agenttigi tóraǵasynyń birinshi orynbasary Oljas Bektenov arnaiy brifing barysynda málim etti.
«Bul jerde mańyzdy másele – sybailas jemqorlyq qylmysyn jasaǵan adamdardy jumysqa ornalastyrýǵa tyiym salý týraly talap buǵan deiin tek memlekettik qyzmet pen kvazimemlekettik sektordyń basshy laýazymdaryna qatysty bolǵanyn atap ótkim keledi. Endi biyl jyl basynan bastap kúshine engen Eńbek kodeksine engizilgen túzetýlerge sáikes sybailas jemqorlyq úshin sottalǵan adamdardy kez kelgen kvazimemlekettik sektor laýazymyna qabyldaýǵa tolyq tyiym salyndy», – dedi Sybailas jemqorlyqqa qarsy is-qimyl agenttigi tóraǵasynyń birinshi orynbasary Oljas Bektenov.
Aita keteiik, brifingte Bektenov Qazaqstan Respýblikasynyń Ákimshilik quqyq buzýshylyqtar týraly Kodeksine engizilgen ózgerister týraly aitty.
«20 naýryzda Memleket basshysy «Qazaqstan Respýblikasynyń Ákimshilik quqyq buzýshylyqtar týraly Kodeksine ózgerister engizý týraly» Zańǵa qol qoidy.
Zań sáýirdiń 5-inen bastap qoldanysqa engizildi.
Atalǵan Zań aiasynda ákimshilik sybailas jemqorlyq quqyq buzýshylyqtar týraly hattamalar jasaý quzireti Sybailas jemqorlyqqa qarsy qyzmetke bekitildi.
Ákimshilik quqyq buzýshylyqtardyń jolyn kesý – jemqorlyq kórinisteriniń aldyn alýdyń tiimdi quraly.
Agenttiktiń tiisti fýnktsiiasy Memleket basshysynyń Jarlyǵymen bekitilgen Erejede de kózdelgen», - dedi Sybailas jemqorlyqqa qarsy is-qimyl agenttigi tóraǵasynyń birinshi orynbasary.
