2018 jyldyń 21 qańtarynda elimizdiń kórnekti memleket jáne qoǵam qairatkeri, Qazaqstanyń eńbek sińirgen óner qairatkeri, otandyq mádeniettiń órleýine ólsheýsiz úles qosqan daryn iesi, on bir jylǵa jýyq Qazaq KSR-niń Mádeniet ministri bolǵan Jeksenbek Erkimbekuly Erkimbekov 88 jasyna qaraǵan shaǵynda ómirden ozdy. Bul týraly QR Mádeniet jáne sport ministrliginiń baspasóz qyzmeti habarlady.
Baspasóz málimetterine qaraǵanda, J. Erkimbekov 1930 jyly 5 qańtarda Almaty oblysy, Eskeldi aýdany, Biǵash aýylynda dúniege kelgen.
Jeksenbek Erkimbekov Almaty memlekettik konservatoriiasyn dombyrashy-dirijer mamandyǵy boiynsha bitirip, Qazaq radio komitetiniń janyndaǵy ult-aspaptar orkestrinde, Qurmanǵazy atyndaǵy halyq aspaptar orkestrinde dombyrashy boldy. Ol Qurmanǵazy orkestri quramynda Býharest qalasyndaǵy Dúniejúzilik jastar men stýdentterdiń IV festivaline qatysyp, altyn medalmen marapattaldy», - delingen habarlamada.
1956-1958 jyldary Almaty horeografiia ýchilishesiniń direktory, Qazaq radiosy mýzyka redaktsiiasynyń kórkemdik jetekshisi, Qazaq KSR-i án-bi ansambliniń direktory, 1959-1961 jyldary Qazaqstan Kommýnistik partiiasy Ortalyq Komitetiniń mádeniet sektorynyń meńgerýshisi, 1961-1966 jyldary Abai atyndaǵy Qazaq memlekettik akademiialyq opera jáne balet teatrynyń direktory qyzmetterin atqardy.
1966-1976 jyldary Qazaq KSR-i Mádeniet ministrliginde óner basqarmasynyń bastyǵy, ministrdiń orynbasary, 1976-1987 Mádeniet ministri bolyp qyzmet etti.
Jeksenbek Erkimbekov Qazaq KSR-niń Mádeniet ministri bolyp qyzmet atqarǵan kezinde mádeniet salasynyń kadrlar daiarlaý deńgeii aitarlyqtai ósip, ansamblder men orkestrler quryldy, jańa teatrlar, filarmoniialar, kitaphanalar, mádeni ortalyqtar, jyljymaly avtoklýbtar jáne avtomýzeiler ashyldy. Almaty qalasynda Respýblika saraiy, M. Áýezov atyndaǵy jáne M. Lermontov atyndaǵy teatrlardyń ǵimarattary soǵylyp, Almaty horeografiialyq ýchilishesi, K. Báiseiitova atyndaǵy jáne A. Jubanov atyndaǵy daryndy balalar mýzyka mektepteriniń, P. Chaikovskii atyndaǵy Almaty mýzyka ýchilishesiniń jataqhanasymen birge jańa ǵimarattary boi kóterip, Ortalyq kontsert zaly, Ulttyq mýzei, Á. Qasteev atyndaǵy mýzei ashyldy.
Elimiz boiynsha jalpy sany 200-ge jýyq mádeniet mekemeleri quryldy. Budan basqa, Jeksenbek Erkimbekuly Qurmanǵazy atyndaǵy Qazaq ulttyq konservatoriiasynyń qurmetti professory, Qazaq KSR-i Joǵarǵy Keńesiniń depýtaty boldy.
Jeksenbek Erkimbekuly Erkimbekovtiń eńbegi memlekettik joǵary nagradalarmen marapattaldy.
Ol 2 ret «Qurmet» ordeni jáne birneshe medaldarmen marapattalǵan. «Jyldar óter, biraq abzal tulǵa Jeksenbek Erkimbekuly Erkimbekovtiń jarqyn beinesi el jadynda máńgi saqtalady.
Marqumnyń týǵan-týysqandarynyń qaiǵylaryna ortaqtasyp, kóńil aitamyz»,-delingen ministrliktiń habarlamasynda.
Marqumdy aqtyq saparǵa shyǵaryp salý rásimi 23 qańtarda, saǵat 10.00-de Almaty qalasynda Abai atyndaǵy akademiialyq memlekettik opera jáne balet teatrynda ótedi.
