Ótken aptada burynǵy qylmystary úshin jasyrynyp, boi tasalap júrgen 107 adam ustaldy. Bul týraly QR Ishki ister ministrliginiń resmi ókili Nurdildá Oraz málim etti, dep habarlaidy "Ult aqparat".
«Ótken aptada Ishki ister ministrligi «Qańǵybas» aýqymdy aldyn alý sharasyn ótkizdi. Bul shara - turaqty turatyn jeri joq, kezbelikke salynyp ómir súretin azamattardyń arasynda qylmys pen quqyqbuzýshylyqty anyqtaý maqsatynda uiymdastyrylyp otyr. Operatsiia nátijesinde 5 500 adam anyqtalyp, olardyń qandai da bir qylmysqa qatystylyǵy ortaq aqparattyq baza arqyly tekserildi«, - dedi ol.
Onyń atap ótýinshe, eki kún ishinde politsiia qyzmetkerleri osy baǵyttaǵy 55 qylmysty ashty. Burynǵy qylmystary úshin jasyrynyp, boi tasalap júrgen 107 azamat ustaldy. Joǵalyp ketkenderdiń sanatynda júrgen 72 adam izdestirilip tabyldy. «Máselen, Almaty qalalyq politsiia departamentiniń qyzmetkerleri 2012 jyly Almaty qalasynda qarýly toppen 3 adamdy óltirý qylmysyna qatysy bar kúdiktini qolǵa túsirdi. Pavlodarlyq politseiler 2012 jyly Resei Federatsiiasynyń Omby oblysynda tonaý jasaǵan kúdiktini ustady. Al Almaty oblysy Ile aýdanynda 2009 jyldyń qazan aiynan beri iz-túzsiz joǵalyp ketken azamat tabyldy«, - dedi Nurdildá Oraz.
