ٶتكەن اپتادا بۇرىنعى قىلمىستارى ٷشٸن جاسىرىنىپ, بوي تاسالاپ جٷرگەن 107 ادام ۇستالدى. بۇل تۋرالى قر ٸشكٸ ٸستەر مينيسترلٸگٸنٸڭ رەسمي ٶكٸلٸ نۇردٸلدە وراز مەلٸم ەتتٸ, دەپ حابارلايدى "ۇلت اقپارات".
«ٶتكەن اپتادا ٸشكٸ ٸستەر مينيسترلٸگٸ «قاڭعىباس» اۋقىمدى الدىن الۋ شاراسىن ٶتكٸزدٸ. بۇل شارا - تۇراقتى تۇراتىن جەرٸ جوق, كەزبەلٸككە سالىنىپ ٶمٸر سٷرەتٸن ازاماتتاردىڭ اراسىندا قىلمىس پەن قۇقىقبۇزۋشىلىقتى انىقتاۋ ماقساتىندا ۇيىمداستىرىلىپ وتىر. وپەراتسييا نەتيجەسٸندە 5 500 ادام انىقتالىپ, ولاردىڭ قانداي دا بٸر قىلمىسقا قاتىستىلىعى ورتاق اقپاراتتىق بازا ارقىلى تەكسەرٸلدٸ«, - دەدٸ ول.
ونىڭ اتاپ ٶتۋٸنشە, ەكٸ كٷن ٸشٸندە پوليتسييا قىزمەتكەرلەرٸ وسى باعىتتاعى 55 قىلمىستى اشتى. بۇرىنعى قىلمىستارى ٷشٸن جاسىرىنىپ, بوي تاسالاپ جٷرگەن 107 ازامات ۇستالدى. جوعالىپ كەتكەندەردٸڭ ساناتىندا جٷرگەن 72 ادام ٸزدەستٸرٸلٸپ تابىلدى. «مەسەلەن, الماتى قالالىق پوليتسييا دەپارتامەنتٸنٸڭ قىزمەتكەرلەرٸ 2012 جىلى الماتى قالاسىندا قارۋلى توپپەن 3 ادامدى ٶلتٸرۋ قىلمىسىنا قاتىسى بار كٷدٸكتٸنٸ قولعا تٷسٸردٸ. پاۆلودارلىق پوليتسەيلەر 2012 جىلى رەسەي فەدەراتسيياسىنىڭ ومبى وبلىسىندا توناۋ جاساعان كٷدٸكتٸنٸ ۇستادى. ال الماتى وبلىسى ٸلە اۋدانىندا 2009 جىلدىڭ قازان ايىنان بەرٸ ٸز-تٷزسٸز جوعالىپ كەتكەن ازامات تابىلدى«, - دەدٸ نۇردٸلدە وراز.
