Abylai hannyń tarihi alańynda «Birjan – Sara» operasy open air formatynda qoiyldy. Alǵash ret Býrabai aspanynyń astynda M.Tólebaevtyń «Birjan – Sara» spektakli qoiyldy. 14 shilde kúni qazaq operasynyń injý-marjanyn elimizdiń bas teatry «Astana Operanyń» aitýly ártisteri oryndady. Kóksheniń ásem taýlarynyń baýraiynda ornalasqan Abylai han alańy basty eki keiipkerdiń mahabbat tarihy órbigen mekenge ainaldy.
Joba QR Mádeniet jáne sport ministrliginiń qoldaýymen Astananyń 20 jyldyǵy aiasynda júzege asyryldy.
«Birjan – Sara» – «Astana Opera» jylnamasynyń aishyqty beti. Dál osy operamen 2013 jyly elordalyq teatrdyń alǵashqy shymyldyǵy túrilgen edi. 2018 jyldyń sáýir aiynda «Astana Opera» ýltra zamanaýi dekoratsiialar men biregei kostiýmderdi paidalaný arqyly jańa mýzykalyq-sahnalyq redaktsiiany kórermen nazaryna usyndy. Budan keiin astanalyq teatrdyń qazaq operasyn júzege asyrýdaǵy izdenisteri tabysty aiaqtaldy dep nyq senimmen aitýǵa bolady.
Osynaý jańartylǵan spektakldi Býrabai turǵyndary men qonaqtary tamashalai aldy. «Ashyq aspan astyndaǵy zalda» otyrǵan árbir kórermenge qoiylym avtorlary Ashat Maemirov, Abzal Muhitdinov, Sofia Tasmaǵambetova men Pavel Dragýnov ulttyq siýjet negizindegi jalpy adamzattyq mán-maǵynany jetkize aldy.
Juldyzdy aspan, qylqan japyraqtardyń hosh iisi men samal jel erekshe atmosfera jasady. Spektakldiń ón boiy tabiǵatpen keremet úilesti. Týǵan ólkesiniń sulý tabiǵatyn ánge qosqan Birjannyń (Meiir Bainesh) sózderi týyndyǵa asqaq reńk pen ǵalamat aýqym berdi.
«Astana Opera» vokalisteri ashyq aspan astynda óner kórsetý boiynsha mol tájiribege ie. Osy syndy jobalardy teatr birneshe jyl kóleminde júzege asyryp keledi. Degenmen, trýppa barlyq spektaklderdi Astana tórinde oryndaǵan, sondyqtan mizanstsenalardy daiyndap, jańa «jandy dekoratsiialarǵa» boi úiretý úshin ártister Býrabai ólkesine erterek jol tartty, al sol mańdaǵy týrister daiyndyq barysyna qyzyǵýshylyq tanytty.
Basty partiialardy teatrdyń jetekshi solisteri tamasha oryndap shyqty. Kóptegen halyqaralyq baiqaýlardyń laýreaty Meiir Bainesh (Birjan) keremet akterlik sheberligi men vokaldyq darynyn pash etti. Sara – Qazaqstannyń eńbek sińirgen ártisi, memlekettik syilyqtyń laýreaty Maira Muhamedqyzy óz keiipkeriniń názik sezimin jetkize otyryp, beinesin nyq senimmen kórsetti, tyńdarman qaýym ártisti ystyq yqylaspen qabyl alyp, qoshemet bildirdi. Janbota – Qazaqstannyń eńbek sińirgen qairatkeri Janat Shybyqbaev pen Analyq – Qazaqstannyń eńbek sińirgen qairatkeri Dina Hamzina sahnada janyn sala óner kórsetti, olardyń daryny arqasynda airyqsha teatr siqyry sezildi. Qazaqstannyń eńbek sińirgen qairatkeri Saltanat Ahmetova men kóptegen halyqaralyq baiqaýlardyń laýreaty Talǵat Ǵaleev Aqmola oblysynyń týmasy, sondyqtan da olar týǵan ólkesinde erekshe yqylaspen án saldy. Saltanat qyzǵanshaq Altynaidyń rólin keremet somdady. Talǵat Jienquldyń partiiasyn tamasha alyp shyqty. Qojaǵul – Shyńǵys Rasylhan, Serik – Ramzat Balakishiev, Estai – Beiimbet Tańaryqov óz keiipkerleriniń san qyryn ashyp, naqyshpen jetkize aldy.
Qaraǵaily ormannyń arasynan «Astana Opera» Simfoniialyq orkestrin estý airyqsha tańsyq jait boldy. Alaida, mýzykanttar árdaiym sheberlikteriniń joǵary deńgeiin kórsetýde. Orkestrge qoiýshy dirijer – Qazaqstannyń eńbek sińirgen qairatkeri Abzal Muhitdinovtyń ózi basshylyq etti. Bas hormeister Qazaqstannyń eńbek sińirgen qairatkeri E.Dáýitovtyń jetekshiligimen hor da óz sheberlikterin kórsetti.
Airyqsha áserge bólengen qaýym elordalyq ártisterdi sahnadan jibermei, ystyq yqylastaryn bildirdi, dý qol shapalaqtyń daýysy ormannyń qalypty tynyshtyǵyn buzdy, al sybdyr qaqqan aǵash japyraqtary kórermenmen birge qol soǵyp, qoshemet bildirgendei áserde boldy. Keremet úndestik oryn aldy. Asqaq ónerdiń merekesi oidaǵydai ótti.
Eske salar bolsaq, qoiýshy rejisser – PhD doktory, Qazaqstannyń eńbek sińirgen qairatkeri A.Maemirov, keńesshi rejisser – Belarýs Úlken teatrynyń bas rejisseri, G.Týkai atyndaǵy Tatarstan Respýblikasy Memlekettik syilyǵynyń laýreaty M.Pandjavidze, rejisser – N.Kagadii, baletmeisterler – M.Avahri, Qazaqstannyń eńbek sińirgen qairatkeri A.Táti, qoiýshy rejisserdiń assistenti – E.Toikenov. Qoiýshy sýretshiler men stsenograftar – S.Tasmaǵambetova men P.Dragýnov.
Joba «Qazaq áýenderi» qoǵamymen birge jasaldy.
