Senat tóraǵasy Qasym-Jomart Toqaev Bi-bi-si-degi Hardtalk baǵdarlamasyna bergen suhbatynda Nursultan Nazarbaevtyń 2020 jyly ótetin prezidenttik sailaýǵa qatyspaityny týraly aitqan sózin túsindirdi, dep habarlaidy Sputnik Qazaqstan.
"Meniń oiymsha, bul suhbatta nazar basqa jaqqa aýdarylǵan, óitkeni kóp másele talqylanǵan bolatyn. Bul másele sonyń biri ǵana boldy. Hardtalk aiasynda suhbat berý ońai emes, degenmen men olardyń suraqtaryna jaýap berýdi jón kórdim. Sebebi elimizde demokratiiany, ekonomikalyq áleýetti damytý úshin qandai jumys jasalyp jatqanyn aitýymyz kerek. Bul Batystyń Qazaqstandy túsinýi úshin qajet. Osy turǵyda suhbat paidaly boldy dep esepteimin", — dedi Toqaev BAQ ókilderine.
"Men birinshi kezekte Elbasy ózi sheshim qabyldaitynyn aittym. Ol - parasatty, aqyldy adam, uly kóshbasshy ekenin tilge tiek ettim. Bul jeri suhbattan alynyp tastalǵan. Áńgime barysynda aitylǵan bul sózge qatysty qara aspandy tóndirýdiń qajeti joq. Suhbat óte qyzyqty boldy", — dep qosty senat tóraǵasy.
Onyń aitýynsha, Nazarbaevtyń kelesi sailaýǵa qatysatyny ne qatyspaitynyna qaramastan ishki jáne syrtqy saiasat máseleleri boiynsha sońǵy sózdi Elbasy aitady, óitkeni ol "ult kóshbasshysy bolyp qala beredi".
Budan bólek, jýrnalister Toqaevtan 2020 jyly ótetin prezidenttik sailaýǵa Nazarbaevtan basqa kim qatysýy múmkin ekenin surady.
"Bul meniń quzyrymdaǵy másele emes. Bul múldem basqa suraq. Men óz sózime jaýap beremin. Men elimizdiń óziniń ult kóshbasshysy bar ekenin aittym, ony elimizdiń búkil halqy derlik qoldap otyrǵanyn aitpaǵanda, halyqaralyq arenada orasan zor bedeli bar", — dep jaýap berdi Toqaev.
"Biz barlyq bolýy múmkin jaǵdaidy eskerýimiz kerek", — dedi senat spikeri Nazarbaevtyń kelesi sailaýǵa qatyspaý múmkindigine qatysty BAQ ókilderiniń suraǵyna jaýap bere otyryp.
Qazaqstannyń qazirgi prezidenti osy jazda 78 jasqa tolady. Ol 1991 jyldyń 1 jeltoqsanynda alǵashqy búkilhalyqtyq sailaýdyń qorytyndysy boiynsha prezident bolyp, sodan beri eldi basqaryp keledi. 2015 jyldyń 26 sáýirinde ótken sońǵy kezekten tys sailaýda memleket basshysy sailaýshylardyń 98% daýysyn ielenip, besinshi ret jeńiske jetti. Onyń ókilettigi 2020 jyldyń sáýirinde aiaqtalady. Kostitýtsiiaǵa sáikes, Nazarbaev Qazaqstannyń tuńǵysh prezidenti retinde bul laýazymǵa ómir boiy sailaýǵa túse alady.
