Elordada QR Tuńǵysh Prezidentiniń tóraǵalyǵymen Qaýipsizdik Keńesiniń otyrysy ótti, dep habarlaidy "Ult aqparat" Elbasy.kz saityna siltememen.
Jiyn barysynda Jambyl oblysy Qordai aýdanyndaǵy jaǵdai, biologiialyq qaýipsizdikti qamtamasyz etý jáne koronavirýstyq infektsiianyń taralýyna qarsy turý máseleleri qaraldy.
Óz sózinde Nursultan Nazarbaev Qordai aýdanynda bolǵan oqiǵa saldarynan qaza tapqandardyń otbasyna kóńil aitty jáne barlyq zardap shekkenderdiń tezirek saýyǵyp ketýin tiledi.
«Bul oqiǵa meni qatty alańdatady. Otyz jyl boiy halqymyzben birge edáýir qiyndyqtardy ótkerip edik. Jastar bul qiyndyqtardy tipti elestete de almaidy. Ol kezde Qazaqstanda 130 kásiporyn jumysyn toqtatty, 2,5 million adam jumyssyz jáne tabyssyz qaldy, úilerinde jylý bolmady, azyq-túlik tapshy boldy. Osynyń bárin birge ótkerdik», - dedi Elbasy.
Sonymen birge, Tuńǵysh Prezident Qazaqstan táýelsizdik alǵannan keiin de áleýmettik-ekonomikalyq salada úlken qiyndyqtar bolǵanyn eske saldy.
«Eger biz kópultty halqymyzdy biriktirip, turaqtylyqty qamtamasyz ete almasaq, búginde elimizge sheteldik investitsiialar kelmes edi, ekonomika turalap qalar edi. Árine, memlekettik jetekshilerge tiisti tapsyrmalar berildi, biraq beibitshilik pen kelisimdi saqtaý – eń aldymen halqymyzdyń jaýapkershiligi», - dedi N. Nazarbaev.
Sonymen birge, Elbasy oqiǵanyń sebepterin muqiiat zerttep, kinálilerdi zań normalaryna sáikes jazalaýdy tapsyrdy.
«Bul másele aǵa býyn ókilderin oilandyrýy tiis. Meniń Ult kóshbasshysy retindegi maqsatym – Qazaqstandy bolashaq urpaq maqtan etetindei deńgeige kóterý. Aǵa býynnyń mindeti – adamdarǵa táýelsiz, damyǵan jáne turaqty memleket qurýdyń bizdiń ortaq maqsatymyz ekenin túsindirý», - dedi Qaýipsizdik Keńesiniń tóraǵasy.
Elbasy Prezident Qasym-Jomart Toqaevtyń tapsyrmasymen Úkimet pen oblys ákimdiginiń zardap shekken eldi mekenderde qalpyna keltirý sharalaryn júrgizip jatqanyn atap ótti.
Sondai-aq, jergilikti atqarýshy jáne quqyq qorǵaý organdarynyń, Qazaqstan halqy Assambleiasy men onyń óńirlik filialdarynyń jumys sapasyna erekshe mán berildi.
«Assambleia men onyń óńirlik ókildikteri belsendi jumys istep, mundai jaǵdailardy baqylaýda ustaýy kerek. Bul – bizdiń ortaq mindetimiz», - dedi Tuńǵysh Prezident.
Otyrys barysynda Jambyl oblysynyń ákimi Berdibek Saparbaev pen Ishki ister ministri Erlan Turǵymbaevtyń tolyqqandy baiandamasy tyńdaldy.
Qordai oqiǵasyn talqylaý aiasynda ortalyq memlekettik jáne jergilikti atqarýshy organdarǵa elimizdiń óńirlerindegi, onyń ishinde jumyspen qamtý jáne infraqurylymdy damytý, áleýmettik nysandardy qaita qurý salasyndaǵy áleýmettik-ekonomikalyq problemalardy sheshýge baǵyttalǵan baǵdarlamalardy odan ári iske asyrý tapsyryldy.
