Foto:tumba.kz
Amerika Qurama Shtattarynyń eń iri megapolisteriniń biri — Los-Andjeles alapat órttiń qursaýynda qaldy. Álemniń kino ortalyǵy sanalatyn bul qalada tótenshe jaǵdailar kórkem filmderdegi dramalyq oqiǵalardy eske salady. Alaida bul joly alapat jalyn dekoratsiia emes, apattyń shyndyǵy. Ult.kz álem nazaryn ózine aýdarǵan órtke sholý jasady.
Tabiǵattyń qahary ma, adamnyń qolymen jasalǵan qasiret pe?
7 qańtarda bastalǵan jalyn qala shetinde ornalasqan orman alqaptarynan bastaý aldy. Jeldiń ekpinimen taralǵan órt turǵyn úilerge, infraqurylymǵa qaýip tóndirdi. Birneshe saǵat ishinde myńdaǵan gektar jer, kúlge ainalǵany habarlandy. Órt sóndirýshiler men qutqarýshylar oqiǵa ornyna birden jetkenimen, apat aýqymy tym keń bolǵandyqtan órt sóndirýshiler qaýqarsyzdyq tanytty. Alǵashty derekter órtti tabiǵi apat dep atady. Keiinnen túrli basylymdar "kisi qolynan qasaqana jasalǵan" degen málimetterdi jariialady. “NewsNation” telearnasy Los-Andjeles politsiia departamentiniń málimetine súienip, órtke qatysty kúdikti qamaýǵa alynǵanyn habarlady.
“Los-Andjeles politsiia departamenti “NewsNation” telearnasyna “Kennet” órtin tergeý endi qasaqana órt qoiý isi retinde qarastyrylyp jatqanyn jáne bir adamnyń qamaýǵa alynǵanyn rastady”, – delingen habarlamada.
Gollivýdtyń qorqynyshty filmderi shyndyqqa ainaldy
Órttiń ortasynda qalǵan kei aýdandarda evakýatsiia jariialandy. BBC taratqan aqparatqa súiensek, shamamen 180 myń adam evakýatsiialandy, 10 myńǵa jýyq qurylys órtenip ketti. Los-Andjeles okrýginiń patologoanatomy jeksenbi kúni órt qurbandarynyń sany 24 adamǵa jetkenin habarlaǵan. Qaitys bolǵandardyń 16-sy Iton aýdanynan, taǵy 8-i Paliseids aýdanynan tabylǵan.
Foto:Reuters (órt sóndirýshiler)
Qalanyń elitalyq aýdandarynda ornalasqan záýlim villalar men sán-saltanatty úiler de otqa orandy. Aimaqtaǵy tanymal akterler men rejisserlerdiń keibiri qaýipsiz oryndarǵa kóshirildi. Áleýmettik jelide paida bolǵan beinerolikterden joldardy jaýyp, aimaqtan halyqty shyǵaryp jatqan sátterdi kórýge bolady. Ádette ekrannan kóretin kórinister endi Los-Andjeles turǵyndarynyń shynaiy ómirine ainaldy.
«Úiimiz tikelei efirde órtendi» órt juldyzdardyń múlkin joidy
Alapat órt Pasifik-Paliseids aýdanynda 60 sharshy kilometrden astam aýmaqty qamtyp jatyr. Malibý men Santa-Monika qalalary arasyndaǵy aimaq óziniń elitalyq jyljymaityn múlkimen tanymal. Bul jerde Gollivýdtyń basty juldyzdary turady. Olardyń kópshiligi úilerinen aiyrylyp, evakýatsiialanýǵa májbúr boldy.
Foto:newsnation (janyp ketken aýdan)
Zardap shekkender arasynda amerikandyq akterler Adam Brodi («Mister i missis Smit», «Odinokie serdtsa» serialynda oinaǵan) jáne Leiton Mister («Spletnitsa» serial) bar. Page Six basylymynda jariialanǵan sýretterde órt olardyń úileriniń birneshe qabatyn qamtyǵany kórinip tur. Ǵimarattyń shatyry tolyǵymen janyp ketken.
Juldyzdy jup úilerin 2019 jyly 6,5 million dollarǵa satyp alǵan. Úsh qabatty úidiń aýmaǵy eki myń sharshy metrden astam, bes jatyn bólme men alty vanna bólmesi bolǵan. Akterler bul úide eki kishkentai balasymen turǵan.
Óz úiinen aktrisa Anna Feris te aiyryldy, ol “Ochen strashnoe kino ” filmi men “Trýdnosti perevoda”, “Gorbataia gora” filmderi arqyly tanymal. Feris 2018 jyly akter Kris Prattpen aiyrylysyp, Pasifik-Paliseids aýdanynan 4,9 million dollarǵa úi satyp alǵan. Aktrisa bul jyljymaityn múlkinde operator Maikl Barrett jáne 12 jastaǵy ulymen turǵan.
BAQ-taǵy sýretterden kórinip turǵandai, órt saldarynan 87 jastaǵy akter Entoni Hopkinstiń («Molchanie iagniat», «Otets») úii tolyq janyp ketken. Akter ázirge bul týraly pikir bildirmedi.
Foto:noi.md (Entoni Hopkins jáne onyń janyp ketken úii)
Malibýdaǵy Peris Hiltonnyń jeke úii de jalyn qorshaýynda qalǵan. Gollivýd juldyzy instagramda órt týraly úlken jazba jazyp, óziniń úii tolyǵymen janyp ketkenin jetkizgen.
“Júregim jaraly, sózben aityp jetkizý múmkin emes. Otbasymyzben jańalyqtardy qarap, Malibýdaǵy úiimizdiń tikelei efirde janyp jatqanyn kórý — eshkimniń basynan ótpeýi tiis nárse. Bul úiǵe qatysty kóptegen qundy estelikterimiz bar edi”,- dep jazdy Hilton.
Akter Billi Kristal men onyń jubaiy Djenis órttiń saldarynan 46 jyl turǵan Pasifik-Paliseids aýdanyndaǵy úiinen airyldy.
“Men jáne Djenis 1979 jyldan beri osy úide turdyq. Biz balalarymyz ben nemerelerimizdi osynda ósirdik. Úiimizdiń ár buryshy súiispenshilikke toly edi. Árine, júregimiz aýyrady, biraq balalarymyz ben dostarymyzdyń mahabbatynyń arqasynda biz muny jeńemiz”, - deidi Kristaldar otbasy.
Akter Djeims Výds CNN efirinde kóz jasyna erik berdi. Ol múlkinen airylǵanyn aityp, jylap aldy.
Foto: variety.com (Djeims Výds CNN efirinde)
Apattyń saldarynan kóptegen juldyzdar evakýatsiialanýǵa májbúr boldy. BAQ-qa belgili bolǵandai, qaýipsiz aimaqtarǵa Kaliforniiadan “Oskar” júldesiniń iegerleri Ben Afflek («Ýmnitsa Ýill Hanting», «Operatsiia “Argo”»), akter Mark Hemill (Liýk Skaiýoker «Zvezdnyh voin») jáne Gollivýdtyń dańq kóshesinde juldyzdy eskerkishine ie ánshi Mendi Mýr kóshýge májbúr bolǵan.
“Oskar” iegeri aktrisa Djeimi Li Kertis ta Los-Andjelesten ketken. Ol, instagram arqyly úilerin joǵaltyp, turatyn aýdandary joiylǵan adamdarǵa kómek kórsetýge shaqyryp, ózi 1 mln. dollar qaiyrymdylyqqa bóldi.
“Keshe basseinnen lázzat alyp otyrdyq, al búgin bul jer tozaq siiaqty — búkil aýdanǵa taraǵan haos. Men buǵan tózemin dep oilaǵan edim”, — dep jazan ol.
Mel Gibson 14,5 million dollar turatyn úiinen airyldy. Gollivýdtyń akteri ári rejisseri birneshe jyl boiy óziniń qalaýy boiynsha qaita qurylymdaǵan sándi saraiynda turǵan – kúnniń batýy men tańǵy kórinisteri bar úiinen airylǵan Gibson kóptegen basqa akterlerge qaraǵanda optimistik kózqarasta ekenin, qazir kóńil-kúiin túsirmeitinin jazǵan.
“Endi men ózimniń zattarymnyń barlyǵynan airylǵandai boldym, óitkeni bári kúlge ainaldy. Biraq jaqsy, óte jaqsy jańalyq – meniń otbasymnyń músheleri jáne men súietin adamdar bári jaqsy, saý jáne qaýipsizdikte. Qazir meni alańdatatyny osy”, – deidi akter.
Onyń bailyǵy 300 million dollar dep baǵalanýda.
Foto:focus.ua (Mel Gibsonnyń úii otqa oranǵanǵa deiin)
Leonardo Di Kaprio buryn turǵan úidiń de órtenip ketkeni belgili boldy. Biraq, keibir derekterde, gollivýdtyq akter ony satqan nemese jaqyn týysyna bergen degen aqparat tarady.
“Baqylaýda biraq qaýip bar!” - Qazirgi jaǵdai qalai?
Kaliforniianyń tótenshe jaǵdailar qyzmeti osy aptanyń basynda Los-Andjeleste jel kúsheiip, orman órtiniń tez taralýyna yqpal etýi múmkin dep eskertýde. Eń úlken órt Pasifik-Paliseids aýdanynda bolyp, Brentvýd pen Bel-Eirge qaýip tóndirýde — bul aýdandarda kóptegen amerikalyq juldyzdardyń záýlim úileri ornalasqan.
BBC -diń málimetine súiensek, qazirgi ýaqytta qalada keminde úsh iri órt oshaǵy jalǵasýda: Pasifik-Paliseids aýdanynda (shamamen 96 sharshy km aýmaqty qamtyǵan jáne tek 13%-y baqylaýǵa alynǵan), Iton aýdanynda (shamamen 57 sharshy km, 27%-y baqylaýda) jáne Herst aýdanynda (shamamen 3,2 sharshy km, 89%-y baqylaýǵa alynǵan).
Kaliforniia Tótenshe jaǵdailar qyzmeti «órt baqylaýǵa alyndy» degende, bul onyń tolyq sóndirilgenin emes, tek taralýy toqtatylǵanyn bildiredi dep jetkizýde. Mysaly, eger órt 11% baqylaýda dese, bul tek sol órttiń perimetriniń 11 paiyzy ǵana qaýipsizdik sharalarymen qorshalǵanyn kórsetedi. Bul tabiǵi joldarmen nemese qutqarýshylar jasaǵan (qurǵaq shópterdi tazalaý nemese arnaiy bógetter turǵyzý) bolýy múmkin.
Órt 100% baqylaýǵa alynsa, ol tolyq qorshalyp, ári qarai tarala almaidy degen sóz.
Juma kúni Los-Andjelestegi qatty jel basylyp, jalyndy aýyzdyqtaýǵa órt sóndirýshilerdiń biraz múmkindigi bolǵan. Alaida, keiin jel qaita kúsheigen. Sinoptikterdiń aitýynsha, jeksenbi keshinen sársenbige deiin «Santa-Ana» jeliniń jyldamdyǵy saǵatyna 96 km-ge deiin jetedi, al eń kúshti jel seisenbi kúni bolady dep boljanýda.
Pasadena qalasynyń órt sóndirý qyzmetiniń basshysy Ched Ogastin:
«Ókinishke qarai, búginnen bastap sársenbige deiin qatty jel qaita bastalady. Onyń eń qaýipti kezeńi seisenbi kúni bolady», — dedi.
Sondai-aq, ol: «Biz biraz jetistikke qol jetkizdik, biraq órtti tolyq toqtatamyz deý áli erte», — dep eskertti.
Kaliforniia órt sóndirý qyzmetiniń ókili Todd Hopkins jeksenbi kúni Pasifik-Paliseids aýdanyndaǵy órt 90 sharshy kilometr aýmaqty sharpyp, Brentvýd aýdanyndaǵy qymbat úilerge qaýip tóndirip turǵanyn aitqan. Bul aýdanda Arnold Shvartsenegger men Riz Ýizerspýnnyń úileri bar. Sondai-aq, buryn munda Merilin Monro men O. Djei Simpson turǵan. Brentvýdta Getti kórme ortalyǵy ornalasqan, onda Rembrandt pen Van Gogtyń qundy týyndylary saqtalǵan.
Órt San-Fernando ańǵaryna da taralýy múmkin, ol jerde 1,8 million adam turady. Los-Andjeles sherifi Robert Lýnanyń aitýynsha, 105 myń turǵynǵa evakýatsiialaý týraly buiryq berildi, al 87 myń adamǵa daiyn bolý eskertildi. Buǵan deiin 153 myń adamǵa dereý evakýatsiia týraly habarlanǵan edi.
Bekbolat Muhtar
.jpg)
