فوتو:tumba.kz
امەريكا قۇراما شتاتتارىنىڭ ەڭ ٸرٸ مەگاپوليستەرٸنٸڭ بٸرٸ — لوس-اندجەلەس الاپات ٶرتتٸڭ قۇرساۋىندا قالدى. ەلەمنٸڭ كينو ورتالىعى سانالاتىن بۇل قالادا تٶتەنشە جاعدايلار كٶركەم فيلمدەردەگٸ درامالىق وقيعالاردى ەسكە سالادى. الايدا بۇل جولى الاپات جالىن دەكوراتسييا ەمەس, اپاتتىڭ شىندىعى. Ult.kz ەلەم نازارىن ٶزٸنە اۋدارعان ٶرتكە شولۋ جاسادى.
تابيعاتتىڭ قاھارى ما, ادامنىڭ قولىمەن جاسالعان قاسٸرەت پە?
7 قاڭتاردا باستالعان جالىن قالا شەتٸندە ورنالاسقان ورمان القاپتارىنان باستاۋ الدى. جەلدٸڭ ەكپٸنٸمەن تارالعان ٶرت تۇرعىن ٷيلەرگە, ينفراقۇرىلىمعا قاۋٸپ تٶندٸردٸ. بٸرنەشە ساعات ٸشٸندە مىڭداعان گەكتار جەر, كٷلگە اينالعانى حابارلاندى. ٶرت سٶندٸرۋشٸلەر مەن قۇتقارۋشىلار وقيعا ورنىنا بٸردەن جەتكەنٸمەن, اپات اۋقىمى تىم كەڭ بولعاندىقتان ٶرت سٶندٸرۋشٸلەر قاۋقارسىزدىق تانىتتى. العاشتى دەرەكتەر ٶرتتٸ تابيعي اپات دەپ اتادى. كەيٸننەن تٷرلٸ باسىلىمدار "كٸسٸ قولىنان قاساقانا جاسالعان" دەگەن مەلٸمەتتەردٸ جارييالادى. “NewsNation” تەلەارناسى لوس-اندجەلەس پوليتسييا دەپارتامەنتٸنٸڭ مەلٸمەتٸنە سٷيەنٸپ, ٶرتكە قاتىستى كٷدٸكتٸ قاماۋعا الىنعانىن حابارلادى.
“لوس-اندجەلەس پوليتسييا دەپارتامەنتٸ “NewsNation” تەلەارناسىنا “كەننەت” ٶرتٸن تەرگەۋ ەندٸ قاساقانا ٶرت قويۋ ٸسٸ رەتٸندە قاراستىرىلىپ جاتقانىن جەنە بٸر ادامنىڭ قاماۋعا الىنعانىن راستادى”, – دەلٸنگەن حابارلامادا.
گولليۆۋدتىڭ قورقىنىشتى فيلمدەرٸ شىندىققا اينالدى
ٶرتتٸڭ ورتاسىندا قالعان كەي اۋدانداردا ەۆاكۋاتسييا جارييالاندى. BBC تاراتقان اقپاراتقا سٷيەنسەك, شامامەن 180 مىڭ ادام ەۆاكۋاتسييالاندى, 10 مىڭعا جۋىق قۇرىلىس ٶرتەنٸپ كەتتٸ. لوس-اندجەلەس وكرۋگٸنٸڭ پاتولوگواناتومى جەكسەنبٸ كٷنٸ ٶرت قۇرباندارىنىڭ سانى 24 ادامعا جەتكەنٸن حابارلاعان. قايتىس بولعانداردىڭ 16-سى يتون اۋدانىنان, تاعى 8-ٸ پاليسەيدس اۋدانىنان تابىلعان.
فوتو:Reuters (ٶرت سٶندٸرۋشٸلەر)
قالانىڭ ەليتالىق اۋداندارىندا ورنالاسقان زەۋلٸم ۆيللالار مەن سەن-سالتاناتتى ٷيلەر دە وتقا وراندى. ايماقتاعى تانىمال اكتەرلەر مەن رەجيسسەرلەردٸڭ كەيبٸرٸ قاۋٸپسٸز ورىندارعا كٶشٸرٸلدٸ. ەلەۋمەتتٸك جەلٸدە پايدا بولعان بەينەروليكتەردەن جولداردى جاۋىپ, ايماقتان حالىقتى شىعارىپ جاتقان سەتتەردٸ كٶرۋگە بولادى. ەدەتتە ەكراننان كٶرەتٸن كٶرٸنٸستەر ەندٸ لوس-اندجەلەس تۇرعىندارىنىڭ شىنايى ٶمٸرٸنە اينالدى.
«ٷيٸمٸز تٸكەلەي ەفيردە ٶرتەندٸ» ٶرت جۇلدىزداردىڭ مٷلكٸن جويدى
الاپات ٶرت پاسيفيك-پاليسەيدس اۋدانىندا 60 شارشى كيلومەتردەن استام اۋماقتى قامتىپ جاتىر. ماليبۋ مەن سانتا-مونيكا قالالارى اراسىنداعى ايماق ٶزٸنٸڭ ەليتالىق جىلجىمايتىن مٷلكٸمەن تانىمال. بۇل جەردە گولليۆۋدتىڭ باستى جۇلدىزدارى تۇرادى. ولاردىڭ كٶپشٸلٸگٸ ٷيلەرٸنەن ايىرىلىپ, ەۆاكۋاتسييالانۋعا مەجبٷر بولدى.
فوتو:newsnation (جانىپ كەتكەن اۋدان)
زارداپ شەككەندەر اراسىندا امەريكاندىق اكتەرلەر ادام برودي («ميستەر ي ميسسيس سميت», «ودينوكيە سەردتسا» سەريالىندا ويناعان) جەنە لەيتون ميستەر («سپلەتنيتسا» سەريال) بار. Page Six باسىلىمىندا جارييالانعان سۋرەتتەردە ٶرت ولاردىڭ ٷيلەرٸنٸڭ بٸرنەشە قاباتىن قامتىعانى كٶرٸنٸپ تۇر. عيماراتتىڭ شاتىرى تولىعىمەن جانىپ كەتكەن.
جۇلدىزدى جۇپ ٷيلەرٸن 2019 جىلى 6,5 ميلليون دوللارعا ساتىپ العان. ٷش قاباتتى ٷيدٸڭ اۋماعى ەكٸ مىڭ شارشى مەتردەن استام, بەس جاتىن بٶلمە مەن التى ۆاننا بٶلمەسٸ بولعان. اكتەرلەر بۇل ٷيدە ەكٸ كٸشكەنتاي بالاسىمەن تۇرعان.
ٶز ٷيٸنەن اكتريسا اننا فەريس تە ايىرىلدى, ول “وچەن ستراشنوە كينو ” فيلمٸ مەن “ترۋدنوستي پەرەۆودا”, “گورباتايا گورا” فيلمدەرٸ ارقىلى تانىمال. فەريس 2018 جىلى اكتەر كريس پراتتپەن ايىرىلىسىپ, پاسيفيك-پاليسەيدس اۋدانىنان 4,9 ميلليون دوللارعا ٷي ساتىپ العان. اكتريسا بۇل جىلجىمايتىن مٷلكٸندە وپەراتور مايكل باررەتت جەنە 12 جاستاعى ۇلىمەن تۇرعان.
باق-تاعى سۋرەتتەردەن كٶرٸنٸپ تۇرعانداي, ٶرت سالدارىنان 87 جاستاعى اكتەر ەنتوني حوپكينستٸڭ («مولچانيە ياگنيات», «وتەتس») ٷيٸ تولىق جانىپ كەتكەن. اكتەر ەزٸرگە بۇل تۋرالى پٸكٸر بٸلدٸرمەدٸ.
فوتو:noi.md (ەنتوني حوپكينس جەنە ونىڭ جانىپ كەتكەن ٷيٸ)
ماليبۋداعى پەريس حيلتوننىڭ جەكە ٷيٸ دە جالىن قورشاۋىندا قالعان. گولليۆۋد جۇلدىزى ينستاگرامدا ٶرت تۋرالى ٷلكەن جازبا جازىپ, ٶزٸنٸڭ ٷيٸ تولىعىمەن جانىپ كەتكەنٸن جەتكٸزگەن.
“جٷرەگٸم جارالى, سٶزبەن ايتىپ جەتكٸزۋ مٷمكٸن ەمەس. وتباسىمىزبەن جاڭالىقتاردى قاراپ, ماليبۋداعى ٷيٸمٸزدٸڭ تٸكەلەي ەفيردە جانىپ جاتقانىن كٶرۋ — ەشكٸمنٸڭ باسىنان ٶتپەۋٸ تيٸس نەرسە. بۇل ٷيعە قاتىستى كٶپتەگەن قۇندى ەستەلٸكتەرٸمٸز بار ەدٸ”,- دەپ جازدى حيلتون.
اكتەر بيللي كريستال مەن ونىڭ جۇبايى دجەنيس ٶرتتٸڭ سالدارىنان 46 جىل تۇرعان پاسيفيك-پاليسەيدس اۋدانىنداعى ٷيٸنەن ايرىلدى.
“مەن جەنە دجەنيس 1979 جىلدان بەرٸ وسى ٷيدە تۇردىق. بٸز بالالارىمىز بەن نەمەرەلەرٸمٸزدٸ وسىندا ٶسٸردٸك. ٷيٸمٸزدٸڭ ەر بۇرىشى سٷيٸسپەنشٸلٸككە تولى ەدٸ. ەرينە, جٷرەگٸمٸز اۋىرادى, بٸراق بالالارىمىز بەن دوستارىمىزدىڭ ماحابباتىنىڭ ارقاسىندا بٸز مۇنى جەڭەمٸز”, - دەيدٸ كريستالدار وتباسى.
اكتەر دجەيمس ۆۋدس CNN ەفيرٸندە كٶز جاسىنا ەرٸك بەردٸ. ول مٷلكٸنەن ايرىلعانىن ايتىپ, جىلاپ الدى.
فوتو: variety.com (دجەيمس ۆۋدس CNN ەفيرٸندە)
اپاتتىڭ سالدارىنان كٶپتەگەن جۇلدىزدار ەۆاكۋاتسييالانۋعا مەجبٷر بولدى. باق-قا بەلگٸلٸ بولعانداي, قاۋٸپسٸز ايماقتارعا كاليفورنييادان “وسكار” جٷلدەسٸنٸڭ يەگەرلەرٸ بەن اففلەك («ۋمنيتسا ۋيلل حانتينگ», «وپەراتسييا “ارگو”»), اكتەر مارك حەميلل (ليۋك سكايۋوكەر «زۆەزدنىح ۆوين») جەنە گولليۆۋدتىڭ داڭق كٶشەسٸندە جۇلدىزدى ەسكەركٸشٸنە يە ەنشٸ مەندي مۋر كٶشۋگە مەجبٷر بولعان.
“وسكار” يەگەرٸ اكتريسا دجەيمي لي كەرتيس تا لوس-اندجەلەستەن كەتكەن. ول, ينستاگرام ارقىلى ٷيلەرٸن جوعالتىپ, تۇراتىن اۋداندارى جويىلعان ادامدارعا كٶمەك كٶرسەتۋگە شاقىرىپ, ٶزٸ 1 ملن. دوللار قايىرىمدىلىققا بٶلدٸ.
“كەشە باسسەيننەن لەززات الىپ وتىردىق, ال بٷگٸن بۇل جەر توزاق سيياقتى — بٷكٸل اۋدانعا تاراعان حاوس. مەن بۇعان تٶزەمٸن دەپ ويلاعان ەدٸم”, — دەپ جازان ول.
مەل گيبسون 14,5 ميلليون دوللار تۇراتىن ٷيٸنەن ايرىلدى. گولليۆۋدتىڭ اكتەرٸ ەرٸ رەجيسسەرٸ بٸرنەشە جىل بويى ٶزٸنٸڭ قالاۋى بويىنشا قايتا قۇرىلىمداعان سەندٸ سارايىندا تۇرعان – كٷننٸڭ باتۋى مەن تاڭعى كٶرٸنٸستەرٸ بار ٷيٸنەن ايرىلعان گيبسون كٶپتەگەن باسقا اكتەرلەرگە قاراعاندا وپتيميستٸك كٶزقاراستا ەكەنٸن, قازٸر كٶڭٸل-كٷيٸن تٷسٸرمەيتٸنٸن جازعان.
“ەندٸ مەن ٶزٸمنٸڭ زاتتارىمنىڭ بارلىعىنان ايرىلعانداي بولدىم, ٶيتكەنٸ بەرٸ كٷلگە اينالدى. بٸراق جاقسى, ٶتە جاقسى جاڭالىق – مەنٸڭ وتباسىمنىڭ مٷشەلەرٸ جەنە مەن سٷيەتٸن ادامدار بەرٸ جاقسى, ساۋ جەنە قاۋٸپسٸزدٸكتە. قازٸر مەنٸ الاڭداتاتىنى وسى”, – دەيدٸ اكتەر.
ونىڭ بايلىعى 300 ميلليون دوللار دەپ باعالانۋدا.
فوتو:focus.ua (مەل گيبسوننىڭ ٷيٸ وتقا ورانعانعا دەيٸن)
لەوناردو دي كاپريو بۇرىن تۇرعان ٷيدٸڭ دە ٶرتەنٸپ كەتكەنٸ بەلگٸلٸ بولدى. بٸراق, كەيبٸر دەرەكتەردە, گولليۆۋدتىق اكتەر ونى ساتقان نەمەسە جاقىن تۋىسىنا بەرگەن دەگەن اقپارات تارادى.
“باقىلاۋدا بٸراق قاۋٸپ بار!” - قازٸرگٸ جاعداي قالاي?
كاليفورنييانىڭ تٶتەنشە جاعدايلار قىزمەتٸ وسى اپتانىڭ باسىندا لوس-اندجەلەستە جەل كٷشەيٸپ, ورمان ٶرتٸنٸڭ تەز تارالۋىنا ىقپال ەتۋٸ مٷمكٸن دەپ ەسكەرتۋدە. ەڭ ٷلكەن ٶرت پاسيفيك-پاليسەيدس اۋدانىندا بولىپ, برەنتۆۋد پەن بەل-ەيرگە قاۋٸپ تٶندٸرۋدە — بۇل اۋدانداردا كٶپتەگەن امەريكالىق جۇلدىزداردىڭ زەۋلٸم ٷيلەرٸ ورنالاسقان.
BBC -دٸڭ مەلٸمەتٸنە سٷيەنسەك, قازٸرگٸ ۋاقىتتا قالادا كەمٸندە ٷش ٸرٸ ٶرت وشاعى جالعاسۋدا: پاسيفيك-پاليسەيدس اۋدانىندا (شامامەن 96 شارشى كم اۋماقتى قامتىعان جەنە تەك 13%-ى باقىلاۋعا الىنعان), يتون اۋدانىندا (شامامەن 57 شارشى كم, 27%-ى باقىلاۋدا) جەنە حەرست اۋدانىندا (شامامەن 3,2 شارشى كم, 89%-ى باقىلاۋعا الىنعان).
كاليفورنييا تٶتەنشە جاعدايلار قىزمەتٸ «ٶرت باقىلاۋعا الىندى» دەگەندە, بۇل ونىڭ تولىق سٶندٸرٸلگەنٸن ەمەس, تەك تارالۋى توقتاتىلعانىن بٸلدٸرەدٸ دەپ جەتكٸزۋدە. مىسالى, ەگەر ٶرت 11% باقىلاۋدا دەسە, بۇل تەك سول ٶرتتٸڭ پەريمەترٸنٸڭ 11 پايىزى عانا قاۋٸپسٸزدٸك شارالارىمەن قورشالعانىن كٶرسەتەدٸ. بۇل تابيعي جولدارمەن نەمەسە قۇتقارۋشىلار جاساعان (قۇرعاق شٶپتەردٸ تازالاۋ نەمەسە ارنايى بٶگەتتەر تۇرعىزۋ) بولۋى مٷمكٸن.
ٶرت 100% باقىلاۋعا الىنسا, ول تولىق قورشالىپ, ەرٸ قاراي تارالا المايدى دەگەن سٶز.
جۇما كٷنٸ لوس-اندجەلەستەگٸ قاتتى جەل باسىلىپ, جالىندى اۋىزدىقتاۋعا ٶرت سٶندٸرۋشٸلەردٸڭ بٸراز مٷمكٸندٸگٸ بولعان. الايدا, كەيٸن جەل قايتا كٷشەيگەن. سينوپتيكتەردٸڭ ايتۋىنشا, جەكسەنبٸ كەشٸنەن سەرسەنبٸگە دەيٸن «سانتا-انا» جەلٸنٸڭ جىلدامدىعى ساعاتىنا 96 كم-گە دەيٸن جەتەدٸ, ال ەڭ كٷشتٸ جەل سەيسەنبٸ كٷنٸ بولادى دەپ بولجانۋدا.
پاسادەنا قالاسىنىڭ ٶرت سٶندٸرۋ قىزمەتٸنٸڭ باسشىسى چەد وگاستين:
«ٶكٸنٸشكە قاراي, بٷگٸننەن باستاپ سەرسەنبٸگە دەيٸن قاتتى جەل قايتا باستالادى. ونىڭ ەڭ قاۋٸپتٸ كەزەڭٸ سەيسەنبٸ كٷنٸ بولادى», — دەدٸ.
سونداي-اق, ول: «بٸز بٸراز جەتٸستٸككە قول جەتكٸزدٸك, بٸراق ٶرتتٸ تولىق توقتاتامىز دەۋ ەلٸ ەرتە», — دەپ ەسكەرتتٸ.
كاليفورنييا ٶرت سٶندٸرۋ قىزمەتٸنٸڭ ٶكٸلٸ تودد حوپكينس جەكسەنبٸ كٷنٸ پاسيفيك-پاليسەيدس اۋدانىنداعى ٶرت 90 شارشى كيلومەتر اۋماقتى شارپىپ, برەنتۆۋد اۋدانىنداعى قىمبات ٷيلەرگە قاۋٸپ تٶندٸرٸپ تۇرعانىن ايتقان. بۇل اۋداندا ارنولد شۆارتسەنەگگەر مەن ريز ۋيزەرسپۋننىڭ ٷيلەرٸ بار. سونداي-اق, بۇرىن مۇندا مەريلين مونرو مەن و. دجەي سيمپسون تۇرعان. برەنتۆۋدتا گەتتي كٶرمە ورتالىعى ورنالاسقان, وندا رەمبراندت پەن ۆان گوگتىڭ قۇندى تۋىندىلارى ساقتالعان.
ٶرت سان-فەرناندو اڭعارىنا دا تارالۋى مٷمكٸن, ول جەردە 1,8 ميلليون ادام تۇرادى. لوس-اندجەلەس شەريفٸ روبەرت لۋنانىڭ ايتۋىنشا, 105 مىڭ تۇرعىنعا ەۆاكۋاتسييالاۋ تۋرالى بۇيرىق بەرٸلدٸ, ال 87 مىڭ ادامعا دايىن بولۋ ەسكەرتٸلدٸ. بۇعان دەيٸن 153 مىڭ ادامعا دەرەۋ ەۆاكۋاتسييا تۋرالى حابارلانعان ەدٸ.
بەكبولات مۇحتار
.jpg)
