Foto: ashyq derekkóz
Batys Qazaqstan oblysynda memlekettik kásiporyndardyń birinde asa iri kólemde biýdjet qarajatyn jymqyrý deregi anyqtaldy, dep habarlaidy Ult.kz. Bul týraly oblystyq prokýratýra málim etti.
Aldyn ala málimetterge sáikes, lýdomaniiaǵa shaldyqqan kásiporyn býhgalteri mekeme qarjysyn zańsyz paidalanyp, qarajatty «1XBet» býkmekerlik keńsesinde báske tikken. Sonymen qatar urlanǵan qarjyǵa jańa avtokólik satyp alǵany belgili boldy.
Memleketke keltirilgen jalpy shyǵyn kólemi 118 million teńgeni quraǵan.
Atalǵan derek boiynsha Qazaqstan Respýblikasy Qylmystyq kodeksiniń 189-baby 4-bóliginiń 2-tarmaǵyna sáikes («Bóten múlikti asa iri mólsherde iemdený nemese talan-tarajǵa salý») sotqa deiingi tergep-tekserý bastaldy. Tergeý isin arnaiy prokýrorlar júrgizip jatyr.
Sot sanktsiiasymen kúdikti tergeý izoliatoryna qamaldy. Sondai-aq satyp alynǵan avtokólikke tyiym salyndy.
Prokýratýra ókilderiniń aitýynsha, bul jaǵdai oiynǵa táýeldiliktiń tek jeke adamǵa ǵana emes, memleket múddesine de eleýli ziian keltirýi múmkin ekenin kórsetedi.
Eske salaiyq, 2025 jyly Batys Qazaqstan oblysynda prokýratýra organdarynyń qadaǵalaý aktileri negizinde býkmekerlik keńselerde bás tikkeni úshin túrli memlekettik organdardyń 16 qyzmetkeri qyzmetinen bosatylǵan.
