Qazaqstan Prezidenti Qasym-Jomart Toqaevtyń Nur Otan partiiasynyń kezekten tys HH quryltaiynda sóilegen sózi
***
Asa mártebeli Nursultan Ábishuly!
Qurmetti sezd delegattary!
Partiiamyzdyń HH sezi kúrdeli ári mańyzdy kezeńde ótkizilip otyr. Bul – memleketimizdiń qoǵamdyq-saiasi ómirindegi aitýly oqiǵa.
Búginde Nur Otan partiiasy el taǵdyryna jaýapty eń basty saiasi kúshke ainaldy.
Halqymyz bizge qashanda zor senim artady. Ásirese, jahandyq daǵdarys kezinde el amanatyna erekshe kóńil bólýimiz kerek.
Búkil álemge taraǵan pandemiia Qazaqstanǵa da ońai tigen joq. Memleket azamattardyń densaýlyǵyn qorǵaý úshin barlyq qajetti sharany qabyldady. Partiia tarapynan halyqqa udaiy qoldaý kórsetilip keledi.
Nur Otan belsendileri men eriktileri muqtaj jandardan kómegin aiaǵan joq. Osyndai naqty jumys pen shynaiy janashyrlyq bereke-birligimizdi arttyra túsedi.
Qazaqstan qazirgi jaǵdaiǵa qaramastan, strategiialyq damý maqsattaryn dáiekti túrde júzege asyrady. Bul rette, Elbasy saiasatynyń sabaqtastyǵyn qamtamasyz etý – negizgi mindettiń biri.
Men biylǵy Joldaýymda partiianyń qoǵamdaǵy jetekshi róli týraly aittym. Biz reformalardy júzege asyrý barysynda Nur Otan-nyń zor áleýetine súienetin bolamyz.
Qurmetti delegattar men sezd qonaqtary!
Búginde búkil álem túbegeili ózgerister dáýirine aiaq basty. Halyqaralyq qatynastar júiesi barǵan saiyn belgisizdik pen bei-bereketsizdikke belshesinen batyp barady. Senim daǵdarysy týyndaǵany anyq.
Sońǵy júz jyldyqtaǵy asa tereń retsessiia álemdik ekonomikany ondaǵan jylǵa keri yǵystyryp tastady. Ósimniń burynǵy qarqyny men ornyqty damýdy qalpyna keltirý úshin orasan zor kúsh-jiger jáne ýaqyt kerek. Osynyń saldarynan kóptegen el qiyn jaǵdaida qaldy.
Qazaqstan jetkilikti deńgeide berik negizge ie bolyp otyr. Óitkeni, eń aldymen, bizdiń qarjy resýrstaryna negizdelgen naqty damý josparymyz bar.
Biz jaýapkershiligi mol milliondaǵan azamatymyzdyń arqasynda ishki saiasi turaqtylyqty saqtai bildik. Sondai-aq, biznes qoǵamdastyǵyn qoldap, memlekettiń barlyq áleýmettik mindettemesin oryndai aldyq. Osy jolda halqymyzdyń dástúrli qundylyqtary – ózara kómek, tabandylyq, janashyrlyq sheshýshi ról atqardy.
Biz pandemiia kezinde azamattarymyzdyń shynaiy yntymaqtastyǵy men jappai janqiiarlyǵynyń kýási boldyq. «Biz birgemiz!» urany Qazaqstan patriotizminiń formýlasyna ainaldy. Qaterli dert yryq bermegen qiyn kúnderde biz shyn máninde birge boldyq.
Partiia jáne onyń belsendileri halyqty biriktirýge orasan zor eńbek sińirdi. Naqty ister atqaratyn Nur Otan partiiasy óziniń is-qimyly arqyly kóshbasshylyqqa laiyqtylyǵyn, Qazaqstannyń bolashaǵy úshin búkil jaýapkershilikti moinyna alýǵa daiyn ekenin kórsetti.
Osyndai daǵdarys kezinde bileýshi partiianyń, Úkimet pen búkil qoǵamnyń aldynda biregei múmkindikter paida bolatyny burynnan belgili. Sol tarihi múmkindikti paidalaný úshin biz elimizge damýdyń jańa paradigmasyn usynýymyz qajet. Bul jerde biliktiń barlyq tarmaǵy: Prezident, Úkimet jáne zań shyǵarýshy organ kúsh jumyldyrýy kerek. Sondyqtan aldaǵy sailaýdyń búkil qoǵam úshin mańyzy asa joǵary.
Tuńǵysh Prezident Nursultan Ábishuly Nazarbaev Bes institýttyq reforma men Ult josparynda belgilegen júieli jańǵyrtýlarǵa serpin berýimiz qajet. Osy maqsatpen biz 2025 jylǵa deiin «Ózgerister joly: Ár azamatqa – laiyqty ómir!» sailaýaldy baǵdarlamasyn qabyldaimyz. Bul – jan-jaqty oilastyrylǵan ári naqty júzege asatyn qujat.
Ekonomikadaǵy qiyndyqtarǵa qaramastan, Nur Otan partiiasy baǵdarlamany júzege asyrý úshin Úkimetpen birlesip, aldaǵy besjyldyqqa 21 trillion teńge bólýdi josparlap otyr. Baǵdarlamada eldiń áleýmettik ilgerileýine jáne halyqtyń ál-aýqatyn arttyrýǵa baǵyttalǵan naqty ári tiimdi sharalar usynylady.
Partiia jurtshylyqtan kelip túsken usynys-tilekterdi nazarǵa aldy. Bizdiń baǵdarlamamyzdy búkil elimiz daiyndady deýge tolyq negiz bar.
Qurmetti partiialastar, joldastar!
Bizdiń baǵdarlamamyzda negizgi tórt basymdyq bar.
BIRINShI – Ár azamatqa óz áleýetin júzege asyrý úshin teń múmkindik berý.
Biz áleýmettik-ekonomikalyq saiasatta naryq tásilderin basshylyqqa alamyz. Qarjyny jáne járdemaqyny negizsiz ońdy-soldy taratýdy doǵarý qajet. Memleket ataýly áleýmettik kómekti shyn máninde muqtaj adamdarǵa berý kerek.
Eń bastysy – áleýmettik ádildik. Sol sebepti muqtaj jandarǵa qamqorlyq jasaýǵa basa mán beremiz. Áleýmettik saiasatty júrgizgende qiyndyqqa tap bolǵan azamattarǵa ataýly kómek kórsetý sharalary kúsheitiledi.
Aldaǵy bes jyl ishinde áleýmettik tólemderdi jyl saiyn indeksteý úshin 3 trillion teńgeden astam qarajat bólinedi. Ortaq zeinetaqy mólsheri de jyl saiyn indeksteletin bolady. Bul rette, biz muny infliatsiia deńgeiine 2 paiyz qosyp júzege asyrýdy usynyp otyrmyz.
Turaqty kútimge muqtaj jáne jeke kómekshi qyzmetin paidalanbaityn birinshi toptaǵy múmkindigi shekteýli azamattardyń barlyǵyna qosymsha áleýmettik qoldaý kórsetiledi. Osyǵan orai beriletin arnaýly járdemaqy eń tómengi kúnkóris deńgeiiniń 1,4 ese kóbeitilgen mólsherine teń bolady. Aldaǵy bes jyl ishinde biz erekshe kútimdi qajetsinetin adamdardy arnaýly tehnikalyq quraldarmen qamtamasyz etemiz. Sondai-aq olarǵa tolyqtai ońaltý-saýyqtyrý qyzmetteri usynylady.
Biraq, eń bastysy, ár adamǵa tabys tabý múmkindigin berý kerek. Bul rette, biz naqty sharalar qabyldaimyz. Sonyń nátijesinde, 2025 jylǵa qarai múmkindigi shekteýli azamattardy jumyspen qamtý kórsetkishi 30 paiyzǵa jetedi.
Osyndai jandardyń kásibi qyzmetpen ainalysýymen birge, bilim alýyna da jaǵdai jasaý mańyzdy. Bes jyl ishinde kolledjder men joǵary oqý oryndary inkliýzivti bilim berý júiesimen tolyq qamtylady. Sonymen qatar, mektepke deiingi barlyq mekeme men mektepterde bul kórsetkishti kezeń-kezeńmen 70 paiyzǵa deiin jetkizemiz.
Biz tek áleýmettik kómekke muqtaj jandarǵa ǵana emes, halyqtyń ózge de toptaryna qoldaý kórsetemiz.
Partiialyq tizimdegi 20 paiyzdyq kvota jas kóshbasshylardy qoldaýdyń naqty tetigine ainaldy. Nur Otan-nyń qataryna bilimdi, qaisar jáne jigerli jastar qosyldy.
Áielderdiń qoǵamdyq-saiasi ómirdegi, ekonomikanyń barlyq sektoryndaǵy rólin kúsheitý – álemdik úrdis. Qazirgi ýaqytta partiialyq tizimniń 30 paiyzy áielderden quralǵan. Bul – áielder qaýymy úshin memleket basqarý isine atsalysýǵa jol ashatyn naqty áleýmettik múmkindik.
Partiianyń belsendi qatysýymen Áleýmettik kodeks ázirlenedi. Bul mazmuny jaǵynan múlde jańa qujat bolmaq. Kodekste qoǵam men memleket arasyndaǵy ózara kelisim ornatýdyń tyń tásilderi kórsetiletin bolady.
EKINShI BASYMDYQ – salamatty ziiatker ult qalyptastyrý.
Jańa jahandyq syn-qaterler eskerile otyryp, bilim, ǵylym, densaýlyq saqtaý, mádeniet jáne sport salalaryna jumsalatyn qarajat ulǵaitylatyn bolady. Bul – adam kapitalyna, elimizdiń bolashaǵyna salynatyn strategiialyq investitsiia.
Densaýlyq saqtaý salasyn qarjylandyrý kólemi ishki jalpy ónimniń 5 paiyzynan kem bolmaidy. Jańa epidemiialarǵa árdaiym daiyn bolý kerek. Tsifrlandyrýdy, telemeditsinany, biologiialyq qaýipsizdik infraqurylymyn qamtityn Birtutas ulttyq júie qurý isi aiaqtalady.
Nur-Sultan men Almaty qalalarynda kópbeiindi eki ǵylymi-innovatsiialyq klinika salynady. Óńirlik meditsinany damytý úshin biz elimizdiń barlyq oblysynda 20 zamanaýi meditsinalyq ortalyq salatyn bolamyz. Aýdandyq aýrýhanalar men perzenthanalardy, aýyldyq emdeý mekemelerin barlyq qajetti qural-jabdyqpen qamtamasyz etemiz.
2023 jylǵa qarai dárigerlerdiń eńbekaqysy 2,5 ese ósedi.
Basty maqsat – qazaqstandyqtardyń ortasha ómir súrý jasyn 75-ke deiin uzartý.
Salamatty ómir salty men buqaralyq sportty damytý zor mańyzǵa ie. Sondyqtan balalar men jasóspirimder klýbtaryn tek shaǵyn jáne ortasha qalalarda ǵana emes, sondai-aq tirek bolarlyq barlyq aýylda ashý qajet. Sonymen qatar jattyqtyrýshy-oqytýshylardyń eńbekaqysyn kóterý kerek. Árbir aýyldyq okrýgte sport jónindegi nusqaýshy laýazymyn engizgen jón.
Qurmetti sezge qatysýshylar!
Elimiz básekege qabiletti bolý úshin bilim jáne mádeniet salasyn órkendetýge, jastardy qoldaýǵa basa mán berýimiz kerek.
Búkil Qazaqstan boiynsha 800 jańa mektep salynady. Sonyń arqasynda biz apatty jáne úsh aýysymmen oqytatyn mektepterdiń máselesin tolyq sheshemiz. Barlyq mektep internetpen, kompiýtermen jáne pándik kabinettermen qamtamasyz etiledi.
Aýyl mektepteriniń damýyna erekshe kóńil bólinedi. Shaǵyn qalalar men aýdan ortalyqtarynda, aýyldyq jerlerde ornalasqan 5 myńnan astam mektep jańǵyrtylýy kerek. Pedagog mamandarǵa suranysty arttyryp, bilim sapasyn jaqsartý maqsatynda olardyń jalaqysy 2 ese kóbeiedi.
Jahandyq bilim jáne innovatsiialyq júiege engen zamanaýi zertteý ýniversitetteri bilim ekonomikasynyń negizin quraýǵa tiis. Nazarbaev Ýniversitetiniń tájiribesi boiynsha taǵy da kem degende 2 ozyq óńirlik joǵary oqý orny ashylady. 2025 jylǵa qarai joǵary bilim alý úshin bólinetin granttyń sany 50 paiyzǵa artady. Bul – 75 myń jas azamatymyz joǵary bilimdi tegin alady degen sóz.
Biz stýdentterge materialdyq qoldaý kórsetý isin jalǵastyra beremiz. Stýdentterdiń stipendiiasy 2 esege, magistranttar men doktoranttardyń stipendiiasy 1,5 esege kóbeiedi. 2025 jylǵa qarai kolledjder men ýniversitetter jataqhanalaryndaǵy oryndar sany kem degende 50 myńǵa artady.
«Alǵashqy jumys orny» jobasy iske qosylady. Bul joba jylyna 5 myń adamdy qamtityn bolady. Biznes salasyndaǵy keleshegi zor ideialardy júzege asyrý úshin jas kásipkerlerge jyl saiyn 10 myń grant usynylady.
Jumys istep júrgen jastarǵa jylyna 3 myń jaldamaly páter beriledi. Biz jastar uiymdary men Eriktiler qozǵalysynyń jobalaryn qarjylandyrý kólemin 1,5 esege arttyrýǵa ázirmiz. Osyndai qoldaý sharalary oqymaityn jáne jumys istemeitin jastardyń sanyn 2025 jylǵa qarai 100 myń adamǵa azaitýǵa múmkindik beredi.
Sonymen qatar, balalarǵa qosymsha bilim berý, bos ýaqytty tiimdi paidalaný, shyǵarmashylyq qabiletti damytý máseleleri sheshimin tabady. Barlyq mektepte sportpen jáne shyǵarmashylyqpen ainalysýǵa jaǵdai jasalady. 3 – 6 jas aralyǵyndaǵy balalar mektepke deiingi bilimmen tolyq qamtylýǵa tiis. Osy rette, turǵylyqty jerine qaramastan balanyń bárine birdei kóńil bólinedi.
Biz «Rýhani jańǵyrý» baǵdarlamasyn belsendi túrde júzege asyra beremiz. Bul asa mańyzdy qujat urpaqtyń sanasyn serpiltip, ulttyń jańa bolmysyn qalyptastyrýǵa arqaý bolady.
Budan bólek, memlekettik tildiń qoldanylý aiasyn odan ári keńeitýge kúsh jumyldyramyz. Ana tilimizdi ardaqtamasaq – eldigimizge syn.
Kez kelgen sharýashylyq qyzmetimen ainalysqan jaǵdaida tabiǵatty saqtaý jáne ony qorǵaý mindeti basty qaǵidattyń birine ainalady. Jańa Ekologiialyq kodeks jáne «Jasyl ósim» tujyrymdamasy qabyldanady.
Biz pragmatizm qundylyqtaryn, únemdilik, qanaǵatshyldyq jáne ustamdylyq mádenietin ornyqtyrýymyz kerek.
ÚShINShI BASYMDYQ – ekonomika men óńirlerdiń ornyqty damýy.
Álemdik ekonomikanyń uzaq merzimdi daǵdarysqa tap bolyp otyrǵany anyq. Árine, Qazaqstan da budan edáýir qysym kóretini belgili. Degenmen, daǵdarys – jańa ekonomikalyq model qurý úshin júieli reformalar júrgizýdiń múmkindigi.
Búkil álemdik ekonomika ǵylymy men sanaly saiasatkerler adamzat tarihynda buryn-sońdy bolyp kórmegen jahandyq daǵdarys jaǵdaiynda memlekettiń ekonomikalyq úderisterdi basqarýdaǵy róli shyn máninde artady degen qorytyndyǵa kelip otyr. Qalai degende de, osylai bolýǵa tiis.
Úkimetterdiń basty mindeti – óz memleketi azamattarynyń turmys sapasyn laiyqty qamtamasyz etý. Bizdiń Úkimet osy irgeli maqsatqa qol jetkizýdi kózdep otyr.
Ekonomikalyq ósimge qol jetkizý úshin negizinen mynadai máselelerge basa mán beriledi:
– qatań, biraq teńgerimdi makroekonomikalyq saiasat;
– jeke sektordy qoldaý;
– azamattar aldyndaǵy áleýmettik mindettemelerdi oryndaý.
Mundai strategiia biýdjet shyǵyndaryn qatań baqylaýǵa alýǵa, tiimsiz jeńildikter men sýbsidiialardy alyp tastaýǵa, tómen infliatsiiany saqtaýǵa jáne teńgeniń erkin baǵamyn ustanýǵa negizdeledi.
Fiskaldi salada biýdjet shyǵyndary ońtailandyrylady, munai tapshylyǵy qysqarady, ult bailyǵyn ádiletti bólý qamtamasyz etiledi. Aqsha-nesie saiasaty jalpyulttyq áleýmettik-ekonomikalyq basymdyqtar turǵysynan júzege asyrylady. Nátijesinde biýdjettiń munaidan tys bóliginiń tapshylyǵy 2025 jylǵa qarai, Úkimettiń esebi boiynsha – 6 paiyzdy, al jalpy tapshylyq 3 paiyzdan aspaityn kólemdi quraityn bolady.
Úsh jyl ishinde infliatsiia 4 paiyzǵa, tipti bul kórsetkishten de tómen deńgeige deiin azaiýy yqtimal. Indýstriialandyrýdyń belsendi júrgizilýi óńdeýshi ónerkásiptegi óndiris kólemin 1,5 ese ulǵaitýǵa jol ashady.
Biz úshin jańa baǵyttar – IT salasy men týrizmge shyn máninde basymdyq berý kerek. Osy eki sala boiynsha 300 myńǵa jýyq jańa jumys orny ashylady.
Málimetterdi óńdeý men saqtaý salasyna salynatyn investitsiialar 6 ese ulǵaiady. Biz Qazaqstannyń eksportyn da belsendi túrde ilgeriletetin bolamyz. Maqsatymyz – shikizattyq emes eksport kólemin 2 ese, iaǵni jylyna 40 milliard dollarǵa deiin ulǵaitý. Agrarlyq sektor da zor áleýetke ie. Salany damytýdyń jańa modeline qarai qadam basý kerek. Barlyq qarjylyq jáne qarjylyq emes qoldaý tetikterin strategiialyq mindetterdi sheshýge baǵyttap, tolyǵymen tsifrlandyrý qajet.
Aýyl sharýashylyǵy ónimderin óndiretin jáne óńdeitin 7 iri ekojúie qurylatyn bolady. Buǵan 350 myń fermerlik jáne úi sharýashylyqtary jumyldyrylady. Bul degenimiz – aýyldyqtar úshin jańa jumys oryndary ári turaqty tabys kózi.
600 myń gektardan astam jańa sýarmaly jerlerdi igerý jóninde sharalar qabyldaǵan jón.
2025 jylǵa qarai aýyl sharýashylyǵynyń jiyntyq óniminiń kólemi úshten birindei mólsherge, al eksport kólemi 2 esege deiin ulǵaiady.
Kásipkerlikti qoldaý aiasynda básekelestikti damytýǵa, zań ústemdigin nyǵaitý men sot júiesin jańǵyrtýǵa airyqsha nazar aýdarylady. Bul – negizgi baǵyttar. Onsyz tiimdi naryqtyq ekonomikany qurý múmkin emes.
Qazaqstan biznes júrgizý úshin qolaily sharttar jasalǵan, meilinshe damyǵan elder qataryna qosylýǵa tiis. Bizneske jasalǵan kez kelgen zańsyz kedergi aýyr qylmys retinde qarastyrylatyn bolady.
Tikelei sheteldik investitsiia kólemin jylyna 30 milliard dollarǵa jetkizýdi de josparlap otyrmyz.
Shaǵyn jáne orta bizneske jan-jaqty qoldaý kórsetiledi. 2025 jylǵa qarai shaǵyn jáne orta biznes 4 million qazaqstandyqty jumyspen qamtyp, ishki jalpy ónimniń 35 paiyzyn óndiredi. 50 myń azamatymyz, eń aldymen, aýyl turǵyndary, óz biznesin ashý úshin shaǵyn nesie alady. Josparlanǵan ekonomikalyq baǵdardy júzege asyrý 2025 jylǵa qarai jyl saiynǵy ósim qarqynyn 5 paiyzdan joǵary deńgeide qamtamasyz etýge múmkindik beredi.
Óńirlerdegi turmys sapasyn jaqsartý basty nazarymyzda bolady. Jańa óńirlik standarttarǵa sáikes 3,5 myńnan astam aýyl jańǵyrtylatyn bolady. Barlyq qalalar men aýyldar sýmen qamtamasyz etiledi. 246 iri eldi mekenge gaz tartylady. Mundai eldi mekenderde 900 myń adam turady. Olardyń 350 myńnan astamy – Nur-Sultan, Qaraǵandy, Jezqazǵan jáne Temirtaý qalalarynyń turǵyndary.
53 tazalaý qondyrǵysyn ornatý jáne jańǵyrtý arqyly elimizdiń barlyq óńirindegi aǵyn sýdy tazartýǵa múmkindik týady. Bul – osy saladaǵy túitkildi máseleniń utymdy sheshimi bolmaq.
Jol qurylysy qolǵa alynady. Ár aýylǵa deiingi barlyq joldar, iaǵni 27 myń shaqyrym jol jóndeýden ótkiziledi.
Oblys ortalyqtary men respýblikalyq mańyzy bar qalalar jyldamdyǵy joǵary 5G internetimen qamtamasyz etiledi. Sonymen qatar, aýyldardyń 99 paiyzy osyndai múmkindikke ie bolady.
Aýyldyq jerlerge qajet mamandardy, dárigerlerdi, muǵalimderdi tartýǵa nazar aýdarylady. Olarǵa úi salý úshin jylyna 22 myń jer telimi bólinedi. Oblys ortalyqtarynda jáne shaǵyn qalalarda jylyna
25 myń jer telimi beriledi. Jalpy alǵanda, aldaǵy bes jylda shamamen bir million otbasy úshin 100 million sharshy metrden astam turǵyn úi salynady. Sonyń ishinde 300 myńǵa jýyq páterdi áleýmettik turǵyn úi retinde jeńildikpen paidalanýǵa bolady.
Shól dala máselesin, Semei iadrolyq poligony, «Baiqońyr» kosmodromy tóńiregindegi ekologiialyq túitkilderdi sheshý jumystary jalǵasyn tabady.
Araldyń soltústik bóligin qalpyna keltirý jáne Jaiyq ózeni alabynyń ekologiialyq júiesin saýyqtyrý jóninde sharalar qabyldanady.
TÓRTINShI BASYMDYQ – esep beretin, «halyq únine qulaq asatyn» memleket jáne jaýapty azamattar.
Memleket pen qoǵamnyń ózara senim men jaýapkershilik qaǵidattaryna negizdelgen ózara is-qimylynsyz eldiń júieli jáne turaqty damýy múmkin emes.
El úshin kúrdeli ýaqytta partiia halyqqa etene jaqyndai túsedi. Bizdiń mindetimiz – azamattardyń ózin jáne urpaqtaryn laiyqty turmyspen qamtamasyz etsem degen ádil ári oryndy tilegimen ushtasyp jatqan niettestik pen is-qimyl birligine qol jetkizý. Taǵy da atap óteiin, bizdiń jumysymyzdaǵy basty baǵdar – jurtshylyqtyń talap-tilekteri men muń-muqtajdyqtary. Memleket halyqtyń úni men pikirine qulaq asýǵa mindetti. Parlament pen halyqqa esep beretin Úkimet dál osy baǵytta jumys isteitin bolady. Bul úshin bizder, partiialastar, qoǵamymyzdy tolǵandyratyn barlyq máseleni jaqsy bilýge, onyń jyldam ári tiimdi sheshimin tabýǵa tiispiz.
Partiia jumysynyń tiimdi is-qimyl koefitsienti azamattarymyzdyń turmysyn jaqsartatyn tájiribelik sheshimderge bailanysty bolady. Bos sóz ben qur ýáde emes, naqty is qana halyq senimi men saiasi kóshbasshylyq úshin kúrestegi eń myqty argýment bola alady. Sondyqtan, partiia memlekettik basqarý júiesin jańǵyrtýmen tikelei ainalysady. Bul – strategiialyq sipaty bar mindet.
Bizdiń negizgi basymdyǵymyz – sybailas jemqorlyqpen kúres. Bul – naýqanshyldyq emes, salmaqty, júieli jumys. Memlekettik organdardyń qyzmeti ashyq ári jurtshylyqtyń udaiy baqylaýynda bolýǵa tiis.
Volonterlikti jáne úkimettik emes sektordy jan-jaqty qoldaý – eldi ornyqty damytýdyń kepili. Qoǵam men azamattyq sektor memleket qyzmetiniń barlyq mańyzdy máseleleri boiynsha sheshim qabyldaý úderisine tolyqqandy atsalysýǵa tiis.
Sonymen qatar partiia Jergilikti ózin-ózi basqarý tujyrymdamasyn belsendi ilgeriletetin bolady. Bul qujatta aýyl ákimderin sailaý, «halyq atsalysatyn» biýdjetti retteý, jergilikti bilik organdaryna azamattyq baqylaý júrgizý máseleleri qamtylady.
Álbette, jergilikti ózin-ózi basqarý reformasy osymen toqtap qalmaidy. Partiia paidaly nátijelerge qol jetkizýine qarai osy saladaǵy tiimdi qurylymdardy odan ári ilgeriletýmen ainalysady.
Qymbatty partiialastar!
Kóptegen mańyzdy bastamalar men partiia josparlaǵan ózgerister Elbasynyń baǵdarlamalyq turǵyda sóilegen sózderinde jáne meniń Qazaqstan halqyna Joldaýlarymda kórinis tapqan. Partiiamyzdyń negizin qalaǵan Qazaqstannyń Tuńǵysh Prezidenti strategiiasynyń sabaqtastyǵyn saqtai otyryp, biz halyqtyń turmysyn jaqsartýǵa jáne memlekettiń áleýetin kúsheitýge baǵyttalǵan barlyq jospardy naqty iske asyrýǵa niettimiz.
Saiasattyń sabaqtastyǵy degenimiz jaýapkershilik, uiymshyldyq, eńbek uǵymdarymen ózektes ekenin qaperde ustaǵan jón. Jaýapsyz sózýar-saiasatkerler óz memleketteriniń qaýipsizdigine qater tóndirip, barlyq igilikten op-ońai bas tartady. Al Brest bitiminen bastap, Kavkazdaǵy sońǵy oqiǵalarǵa deiingi jańa tarihtan biletinimiz – saiasi kataklizmder men qaqtyǵystar territoriiadan da aiyrylýǵa ákep soqtyrýy múmkin.
Nur Otan partiiasy – izgi nietke negizdelgen naqty ister partiiasy. Qazaqstannyń jarqyn bolashaǵy úshin zor jaýapkershilik bizge júktelgen. Otanymyzdyń taǵdyry partiianyń strategiiasyn qoldaityn belsendi músheleriniń, shynaiy patriottardyń qolynda.
Elimizdiń aldynda turǵan jańa jahandyq syn-tegeýrinder men qaýip-qaterler bar kúsh-jigerimizdi biriktirýdi talap etedi. Ol úshin búkil qoǵamnyń ortaq iske jumylýy qajet. Barlyq maqsatymyzǵa tek birlik men kelisim arqyly jete alamyz. Sondyqtan elimizde saiasi dialog mádenietin júieli túrde damytý mańyzdy.
Nur Otan tutas ultty biriktiretin bastamalardy usynyp otyr. Aldaǵy ýaqytta da solai bolady. Partiia zań ústemdigi qaǵidatyn keńinen engizedi. Tiisti zańdylyq, sodan týyndaityn tártip pen úilesim bolmasa, qoǵamda ilgerileýge qol jetkizý múmkin emes. Bul – álemdik tájiribede áldeqashan ornyqqan aksioma.
Bizdiń baǵdarlama damyǵan azamattyq qoǵam men ekonomikalyq turǵydan kemeldengen memleket qurýdy kózdeidi. Biz basqarýshy partiia mártebesine ie bolýdyń máni bilik ókilettikterine qol jetkizý emes, el-jurtqa naqty paida ákelýge múmkindik alý ekenin árdaiym este saqtaýǵa tiispiz.
Partiia músheleri, ásirese, memlekettik basqarý júiesindegi joǵary laýazymda otyrǵan azamattar, shynaiy eńbekqorlyqtyń, saiasi jaýapkershiliktiń, azamattyq patriotizmniń ozyq úlgisin kórsetýi kerek. Partiialastarymyzdyń bolashaqta da dál osy ustanymǵa sai bolatynyna kúmánim joq.
Asa qurmetti Nursultan Ábishuly!
Qurmetti sezge qatysýshylar!
Táýelsizdigimizdiń 30 jyldyǵy Májilis jáne máslihat depýtattarynyń sailaýymen bastalmaq. Munyń simvoldyq máni zor. Bul doda barlyq mereitoilyq is-sharalarǵa ideologiialyq jáne mazmundyq turǵydan tyń serpin beretini anyq. Aldaǵy sailaý qoǵamnyń birtutastyǵyn jáne bereke-birligimizdi bekemdei túsedi dep senemin. Bul naýqannyń ashyq, ádil ári zańdy ótýi úshin barlyq jaǵdaidy jasaimyz. Men, Memleket basshysy retinde, muny jiti qadaǵalaimyn. Osyǵan orai Ortalyq sailaý komissiiasyna jáne Bas prokýratýraǵa naqty tapsyrma berdim.
Barsha sailaýshylardy azamattyq belsendilik tanytyp, sailaýǵa qatysýǵa shaqyramyn. Elimizdiń igiligi jáne memleketimizdiń múddesi jolynda tabysqa birge jete bereiik!
Otanymyz máńgi jasasyn!
Halqymyz árqashanda aman bolsyn!
