Jambyl oblysyndaǵy «Otar» áskeri bazasynda Elbasy - QR QK Joǵarǵy Bas qolbasshysy Nursultan Nazarbaev qatysýymen jaýyngerlik parad ótti, dep habarlaidy "Ult aqparat". Parad aldynda Memleket basshysy qazaqstandyqtardy Otan qorǵaýshy kúnimen quttyqtady.
«Qymbatty qazaqstandyqtar, sardarlar men sarbazdar! Qadirli ardagerler! Barshańyzdy Otan qorǵaýshy kúni merekesimen shyn júrekten quttyqtaimyn. Bahadúr babalar Uly Dalamyzdy aq bilektiń kúshimen, aq naizanyń ushymen qorǵap, bizge amanat etip qaldyrdy. «Urandy eldiń urpaǵy aibarly keledi» degen dana halqymyz. Búgingi aibyndy armiiamyz úshin eldiń tynyshtyǵyn saqtap, Táýelsizdiktiń qorǵany bolý - mártebeli zor mindet. Jaýjúrek jaýyngerlerdiń kóteretin júgi aýyr. Biraq ol - abyroily borysh, qasterli paryz. Qarýly Kúshterimiz - halqymyzdyń senimdi tiregi, memlekettiń berik qalqany», - dep atap ótti Elbasy.
Prezident azamattarymyzdy otansúigishtikke tárbieleý isinde áskeri dástúr mańyzdy ról atqaratynyn atap ótti.
"Jaýyngerlik tý — týǵan jerge adaldyqtyń, erlik pen batyrlyqtyń nyshany. Qasietti bairaq rýhy biik, erjúrek sarbazdardy árdaiym jeńiske jeteleidi. Baýyrjan Momyshulynyń "Batyrlyq ósken ortaǵa, kórgen tárbiege bailanysty qalyptasady" degen sózi bar. Azamattarymyzdy otansúigishtikke tárbieleý isinde áskeri dástúr mańyzdy ról atqarady. Ár sarbaz Otan qorǵaýshy retinde óziniń el aldyndaǵy erekshe jaýapkershiligin sezinýge tiis. Qarýly Kúshterimizde jigerli jigittermen qatar aiaýly arýlarymyz da áskeri qyzmetti abyroimen atqaryp júr. Sondyqtan búgingi mereke er azamattarmen qatar sap túzegen qaisar qyzdarymyzǵa da ortaq", — dedi ol.
Nursultan Nazarbaev memlekettiń Otan qorǵaýshylarǵa árqashan qamqorlyq kórsetip keletinin aitty.
"Qazaqstandyq áskeri qyzmetshiler eń qatygez soǵysta fashizmdi jeńgen bizdiń ákelerimiz ben atalarymyzdyń jaýyngerlik aibyny men dańqy dástúriniń laiyqty muragerleri. Biz árqashan olardyń ómir men týǵan jerdiń gúldenýi úshin sheksiz batyrlyǵy men óshpes erligin jadymyzda saqtaimyz. Búginde Qazaqstan armiiasy el Táýelsizdigin senimdi qorǵap tur. UQShU aiasynda ujymdyq qaýipsizdikke tabysty járdemdesýde. Sonymen qatar BUU aiasynda mańyzdy bitimgerlik qyzmetterdi abyroimen oryndap keledi
Ótken jyly áskeri qyzmetshilerdiń laýazymdyq jalaqysy 25 protsentke artty. Áskerilerdi turǵyn úimen qamtamasyz etý máselesi sheshimin taýyp keledi. Munyń bári Qarýly Kúshter sarbazdarynyń ar-namysy men aibynyn arttyrýǵa jol ashady. Sondyqtan men sizderdi áskeri antqa adal bolady dep senemin!", — dedi Elbasy.
Budan buryn habarlanǵandai, 3 myńnan astam sarbaz búgingi paradqa jiti daiyndalǵan.
Áskeri baza aýmaǵynda jaýyngerlik tehnikanyń arnaiy kórmesi kópshilik nazaryna usynylǵan. Paradqa kelgender osy kórmedegi sońǵy úlgidegi áskeri tehnologiialardy tamashalady. Dástúrli túrde jeke quram saltanatty marshpen júrip ótti. Paradqa 300-den astam áskeri tehnika, 40-qa jýyq aviatsiia tehnikasy qatysty. Armiialyq bólimsheler áskeri tehnikanyń zamanaýi úlgilerin is júzinde qoldaný tásilderin kórsetti.
.jpeg)