Búgin, 9 aqpan «Búgin meniń týǵan kúnim, oi páli-ai, myna halqym nege otyr toilamai» dep jyrlaǵan aqiyq aqyn Muqaǵali Maqataevtyń týǵanyna 93 jyl toldy. Muzbalaq aqynnyń lirika óleńderi kópshilik arasynda keńinen tanymal.
Muqaǵali Maqataev – qazaqtyń lirik aqyny, zamanynda laiyq baǵasyn ala almasa da ózinen keiingiler úshin mártebesi biik.
Ol 1931 jyly 9 aqpanda Almaty oblysy qazirgi Raiymbek (burynǵy Narynqol) aýdanynyń Qarasaz aýylynda dúniege kelgen. Ákesi soǵysta qaza taýyp, anasy men ájesiniń tárbiesinde ósedi.
Muqaǵali aqyn 1962 jyly Almatyǵa qonys aýdaryp, ádebi ortaǵa etene aralasa bastaidy. Almaty Shet tilderi institýtynda, Qazaq memlekettik ýniversitetiniń filologiia fakýltetinde, Máskeýdegi M. Gorkii atyndaǵy Álem ádebieti institýtynda bilim alady.
Munan soń «Sotsialistik Qazaqstan» (qazirgi «Egemen Qazaqstan») gazetiniń (1962-1963 jj.), «Mádeniet jáne turmys» (qazirgi «Parasat») (1963-1965 jj.), «Juldyz» (1965-1972 jj.) jýrnaldarynyń redaktsiiasynda, Qazaqstan Jazýshylar odaǵynda (1972-1973 jj.) qyzmet atqarady.
Muqaǵali Almatydaǵy qazaq ádebieti men óneriniń qaimaqtary shoǵyrlanǵan ortada ótkergen az ǵana jyldar ishinde ózindik dara únin, sýretkerlik qaitalanbas darynyn tanytyp, ónimdi eńbektene bildi.
«Ilich» (1964), «Armysyńdar dostar» (1966), «Qarlyǵashym, keldiń be?», «Mavr» (1970), «Aqqýlar uiyqtaǵanda» (1973), «Shýaǵym meniń» (1975) atty jyr jinaqtaryn kóziniń tirisinde jariialap úlgerdi.
Aqyn poeziiasynyń qainar kózi, shabyt tuǵyry – týǵan eli, ósken jeri, Otan taǵdyry, zamana tynysy, zamandastarynyń arman-ańsary. Osynyń bárin ol jas darynǵa tán qaitalanbas sheberlikpen, ár júrekpen til tabysar syrshyl da shynshyl sezimmen, naǵyz poeziiaǵa ǵana tán beineli obrazdarmen bederlep, ólmes týyndylardy dúniege ákeldi.
Aqynnyń tuńǵysh óleńderi «Qyrman basynda», «Qoishy bala – Ákitai» aýdandyq «Sovettik shekara» gazetinde jariialandy (1949). «Inimniń oiy», «Sheber» óleńderi «Jastyq jyry» atty jinaqqa endi (1951). Alǵash Muqaǵali talantyn baǵalaǵan Á.Tájibaev: «Ózińnen de jigerlileý, ottylaý jas jetkinshek jetkende, maqtanbasqa bola ma?!» – dep baǵa bergen.
Muqaǵalidyń «Qarlyǵashym, keldiń be?», «Dariǵa júrek» (1972 jyly), «Aqqýlar uiyqtaǵanda», «Shýaǵym meniń» (1975 j.), «Soǵady júrek», «Sholpan», «Jyrlaidy júrek», «Ómir-ózen», «Ómir-dastan» jáne t.b. jyr jinaqtary, sondai-aq, «Qosh, mahabbat!» (1988 jyly) atty prozalyq kitaby da bar.
Birshama óleńine án jazyldy. Ózin aýdarmashylyq qyrynan da synap kórgen Muqaǵali Danteniń «Qudiretti komediiasynyń» «Tamuq» degen bólimin (1971 jyly), Shekspirdiń «Sonetterin» (1970 jyly), Ýolt Ýitmenniń óleńderin (1969 jyly) qazaq tiline aýdardy.
