Búgin elimizdegi mektepterdiń bárinde sońǵy qońyraý soǵylyp, túlekter úlken ómirge qanat qaǵady, dep habarlaidy "Ult aqparat".
Pandemiia osymen ekinshi jyl qatarynan mektepterdegi sońǵy qońyraý rásimine ózgeris engizip otyr. 2020-2021 oqý jylynda 3 mln 400 myń bala mektepte bilim aldy. Onyń ishinde qorytyndy attestattaýǵa baratyn 264 800-den astam 9 synyp túlegi, 154 400-den astam 11 synyp túlegi bar.
Bilim jáne ǵylym ministrligi biylǵy sońǵy qońyraý sharalaryn úsh túrli formatta ótkizýge ruqsat berip otyr. Mektepke deiingi jáne orta bilim berý komitetiniń tóraǵasy Maira Meldebekovanyń aitýynsha, dástúrli formattaǵy sońǵy qońyraý negizinen 9 jáne 11 synyp túlekteri úshin uiymdastyrylmaq. Biraq ózge synyptarǵa jappai shekteý qoiylyp otyrǵan joq.
«Erteń – elimizdegi mektepterdiń bári úshin sońǵy qońyraý kúni. Ony ótkizý formaty boiynsha Bilim jáne ǵylym ministrliginiń tarapynan metodikalyq nusqaýlyq jiberildi. Naqtyraq aitsaq, birneshe format usynyldy. Birinshiden, attestat alatyn synyptar úshin mekteptegi sońǵy qońyraý ekenin eskere otyryp, 9-11 synyptarǵa dástúrli formatta ótkizýdi usyndyq. Ekinshi format boiynsha ár synyp jeke ótkize alady. Jeke oqýshylardy shaqyryp ta, synyp saǵaty retinde de ótkizýge bolady. Úshinshiden, ózderi úirengen onlain format boiynsha ótkize alady», - deidi Maira Meldebaeva.
Eldegi epidemiologiialyq ahýalǵa bailanysty túlekterge attestat tapsyrý saltanaty ár mekteptiń aýlasynda ótýi tiis. Iaǵni, burynǵydai ortalyq alańdarda saltanatty sharalar uiymdastyrýǵa tyiym salynyp otyr. Bilim jáne ǵylym ministrligi attestat tapsyrý saltanatynyń sońyn dýmandy keshke ulastyrýǵa da jol berilmeitinin eskertti.
«Birinshiden, bul isti jergilikti atqarýshy organdar qadaǵalaýy kerek. Bilim jáne ǵylym ministrligi tarapynan metodikalyq nusqaý berildi. Saltanatty shara tek mekteptiń aýlasynda bolady. Iaǵni, attestat tapsyrý rásimi keste boiynsha ótedi. Odan ári qarai jalǵastyryp, kesh uiymdastyrýǵa múldem tyiym salynǵan. Muǵalimder oqýshylar attestat alǵansha bailanysta bolady. Árbir oqýshy, árbir ata-ana, árbir muǵalim qaýipsizdik úshin tyiym salynyp otyrǵanyn túsinýi kerek. Santitarlyq-epidemiologiialyq ahýalǵa bailanysty túsinistikpen qaraǵany jón», - deidi Mektepke deiingi jáne orta bilim berý komitetiniń tóraǵasy Maira Meldebekova.
Eń bastysy, búgin sońǵy qońyraý soǵylǵanymen, oqý jyly tolyq aiaqtalmaidy. Bilim jáne ǵylym ministrligi qashyqtan oqytýda ketken olqylyqtardyń ornyn toltyrý úshin 26 mamyr men 19 maýsym aralyǵynda jazǵy mektep jobasyn iske asyrý týraly sheshim qabyldaǵan bolatyn. Oǵan oqýshylardyń qatysýyn ata-analardyń ózi sheshedi. Iaǵni, kim de kim balasy oqý jylynda alýy tiis bilimdi tolyq meńgermedi dep eseptese, jazǵy mektepke jazyla alady. «Besinshi toqsan» oqýshylaryna bilim alýdyń birneshe formaty usynylmaq.
«Qosymsha sabaqtar ata-ananyń qalaýymen ótkiziledi. Onyń formaty da ártúrli bolady. Keibir mektepterde synyptar dástúrli formatta jumys isteýi múmkin nemese ár oqýshymen jeke jumys júrgizilýi múmkin. Iaǵni, format oqýshynyń qandai taqyrypty igermegenine bailanysty bolady», - dedi Maira Meldebekova.
