23 qazanda álemde Halyqaralyq qar barysy kúni atap ótiledi. Bul kún 2013 jyly Bishkektegi qar barysyn qorǵaý týraly ótken dúniejúzilik forýmda bekitildi, dep habarlaidy QazAqparat QR Ekologiia ministrliginiń baspasóz qyzmetine silteme jasap.
Qar barysy taralý aýqymy men sany azaia bastaǵan jyrtqysh retinde Qazaqstannyń Qyzyl kitabyna engen.
Ekologiia, geologiia jáne tabiǵi resýrstar ministrligi elimizde 130-ǵa jýyq qar barysy bar ekenin habarlaidy.
Olar 9 erekshe qorǵalatyn tabiǵi aýmaqtarda mekendeidi: Ile Alataýy, Jońǵar Alataýy, Kólsai kólderi, Katon Qaraǵai, Sairam-Ógem, Sharyn, Altyn Emel MUTP, Aqsý-Jabaǵyly jáne Almaty memlekettik tabiǵi qoryqtary.
BUU Damý baǵdarlamasy aiasynda «Qar barysyn saqtaý jónindegi ulttyq is-qimyl jospary» ázirlendi. Jospardyń maqsaty qar barysynyń popýliatsiiasyn ǵylymi zertteý bolyp tabylady.
Fototuzaq arqyly «Altyn-Emel» MUTP aýmaǵyn da qar byrysy meken etetini anyqtaldy. Munda qar barysynyń otbasy tirkelgen.
Qar barysy 2700-5000 metr biiktikte ómir súredi. Quiryǵynyń uzyndyǵy 1 metrge, denesiniń uzyndyǵy 2,1 m jetetinderi de kezdesedi.
Qar barysy Qazaqstannan bólek Qytai, Mońǵoliia, Indiia, Nepal, Qyrǵyzstan, Pákistan, Tájikstan, Resei, Aýǵanstan, Býtan, Ózbekstan jerlerinde de kezdesedi.
Jer betindegi qar barysynyń jalpy sany 4-6 myń aralyǵynda.
