6 shilde kúni jyl saiyn qazaqstandyqtar Astana kúnin atap ótedi. Biyl Astananyń Qazaqstannyń bas qalasy bolǵanyna 20 jyl tolyp otyr.
20 jyl, 240 ai nemese 7300 kún... Adamzat tarihy úshin qas-qaǵym sát desek te, Astana úshin osy 20 jyldyq ýaqyt - jasampazdyqtyń tarihyna ainalǵany shyndyq.
Elordany Almatydan Aqmolaǵa kóshirý týraly sheshimdi 1994 jylǵy 6 shildede Qazaqstan Respýblikasy Joǵarǵy Keńesi qabyldaǵan bolatyn. 1997 jyly 10 jeltoqsanda QR astanasy Almaty qalasynan Aqmola qalasyna resmi túrde aýystyryldy. QR Prezidentiniń 1998 jylǵy 6 mamyrdaǵy Jarlyǵymen Aqmola ataýynyń Astana bolyp ózgertildi. Jańa astananyń halyqaralyq tusaýkeseri 1998 jylǵy 10 maýsymda ótken edi.
Memlekettik deńgeide Astana kúni 2009 jyldan beri atalyp ótip keledi.
Astananyń 20 jyldyǵy degende, «bul toidyń burynǵydan ózgerek» bolary aiqyn. Sebebi, elordanyń 20 jyldyǵyna arnap Qazaqstannyń barlyq óńirleri óziniń syiyn tartý etip jatyr. Atap aitqanda, elordanyń toiyna arnap, Atyraý oblysy Esil ózeni arqyly ótetin velosipedshiler men jaiaý júrginshilerge arnalǵan jańa kópirdi syiǵa tartsa, Shyǵys Qazaqstan óńiri elordadaǵy eń úlken fontandy salyp berdi. Sol sekildi Almaty oblysy Jetisý saiabaǵyn tartý etti. «Shahterlar qalasy» da syi-qurmetten kende emes: qaraǵandylyqtardyń atynan elordaǵa «Ulytaý» alleiasy men «Qazaq eline myń alǵys!» dep atalǵan monýment ornatyldy. Bir sózben, Qazaqstannyń qai oblysy bolmasyn, basty ordasyna baryn syilap, qurmetin kórsetýde.
"Qalaǵa birdeńe syilaǵysy keledi: bireýleri gúl baǵyn, endi biri jańa kóshe, bireýi mektep, balabaqsha. Olarǵa úlken raqmetimdi aitamyn, óitkeni bul bizdiń Otanymyzdyń astanasy, barsha qazaqstandyqtyń elordasy. Sondyqtan elordada ár óńirdi eske salatyn oryndardyń bolǵany durys. Onyń ústine, bul jerge Qazaqstannyń túkpir-túkpirinen adamdar jinalǵan", — degen edi Elbasy.
Búgin elordanyń eleýli datasyna orai búkil Qazaqstan jurtshylyǵy mereili merekeni keńinen atap ótedi. Dese de, Astananyń óziniń saltanaty men dýmany erekshe bolmaq. Atap aitqanda, tústen keiin qala shetindegi «Qazanat» atshabarynda dúbirli báige uiymdastyrylsa, keshqurym qalada otandyq jáne sheteldik estrada juldyzdarynyń qatysýymen umytylmas kontserttik kesh ótkiziledi.
.jpeg)