6 شٸلدە كٷنٸ جىل سايىن قازاقستاندىقتار استانا كٷنٸن اتاپ ٶتەدٸ. بيىل استانانىڭ قازاقستاننىڭ باس قالاسى بولعانىنا 20 جىل تولىپ وتىر.
20 جىل, 240 اي نەمەسە 7300 كٷن... ادامزات تاريحى ٷشٸن قاس-قاعىم سەت دەسەك تە, استانا ٷشٸن وسى 20 جىلدىق ۋاقىت - جاسامپازدىقتىڭ تاريحىنا اينالعانى شىندىق.
ەلوردانى الماتىدان اقمولاعا كٶشٸرۋ تۋرالى شەشٸمدٸ 1994 جىلعى 6 شٸلدەدە قازاقستان رەسپۋبليكاسى جوعارعى كەڭەسٸ قابىلداعان بولاتىن. 1997 جىلى 10 جەلتوقساندا قر استاناسى الماتى قالاسىنان اقمولا قالاسىنا رەسمي تٷردە اۋىستىرىلدى. قر پرەزيدەنتٸنٸڭ 1998 جىلعى 6 مامىرداعى جارلىعىمەن اقمولا اتاۋىنىڭ استانا بولىپ ٶزگەرتٸلدٸ. جاڭا استانانىڭ حالىقارالىق تۇساۋكەسەرٸ 1998 جىلعى 10 ماۋسىمدا ٶتكەن ەدٸ.
مەملەكەتتٸك دەڭگەيدە استانا كٷنٸ 2009 جىلدان بەرٸ اتالىپ ٶتٸپ كەلەدٸ.
استانانىڭ 20 جىلدىعى دەگەندە, «بۇل تويدىڭ بۇرىنعىدان ٶزگەرەك» بولارى ايقىن. سەبەبٸ, ەلوردانىڭ 20 جىلدىعىنا ارناپ قازاقستاننىڭ بارلىق ٶڭٸرلەرٸ ٶزٸنٸڭ سىيىن تارتۋ ەتٸپ جاتىر. اتاپ ايتقاندا, ەلوردانىڭ تويىنا ارناپ, اتىراۋ وبلىسى ەسٸل ٶزەنٸ ارقىلى ٶتەتٸن ۆەلوسيپەدشٸلەر مەن جاياۋ جٷرگٸنشٸلەرگە ارنالعان جاڭا كٶپٸردٸ سىيعا تارتسا, شىعىس قازاقستان ٶڭٸرٸ ەلورداداعى ەڭ ٷلكەن فونتاندى سالىپ بەردٸ. سول سەكٸلدٸ الماتى وبلىسى جەتٸسۋ ساياباعىن تارتۋ ەتتٸ. «شاحتەرلار قالاسى» دا سىي-قۇرمەتتەن كەندە ەمەس: قاراعاندىلىقتاردىڭ اتىنان ەلورداعا «ۇلىتاۋ» اللەياسى مەن «قازاق ەلٸنە مىڭ العىس!» دەپ اتالعان مونۋمەنت ورناتىلدى. بٸر سٶزبەن, قازاقستاننىڭ قاي وبلىسى بولماسىن, باستى ورداسىنا بارىن سىيلاپ, قۇرمەتٸن كٶرسەتۋدە.
"قالاعا بٸردەڭە سىيلاعىسى كەلەدٸ: بٸرەۋلەرٸ گٷل باعىن, ەندٸ بٸرٸ جاڭا كٶشە, بٸرەۋٸ مەكتەپ, بالاباقشا. ولارعا ٷلكەن راقمەتٸمدٸ ايتامىن, ٶيتكەنٸ بۇل بٸزدٸڭ وتانىمىزدىڭ استاناسى, بارشا قازاقستاندىقتىڭ ەلورداسى. سوندىقتان ەلوردادا ەر ٶڭٸردٸ ەسكە سالاتىن ورىنداردىڭ بولعانى دۇرىس. ونىڭ ٷستٸنە, بۇل جەرگە قازاقستاننىڭ تٷكپٸر-تٷكپٸرٸنەن ادامدار جينالعان", — دەگەن ەدٸ ەلباسى.
بٷگٸن ەلوردانىڭ ەلەۋلٸ داتاسىنا وراي بٷكٸل قازاقستان جۇرتشىلىعى مەرەيلٸ مەرەكەنٸ كەڭٸنەن اتاپ ٶتەدٸ. دەسە دە, استانانىڭ ٶزٸنٸڭ سالتاناتى مەن دۋمانى ەرەكشە بولماق. اتاپ ايتقاندا, تٷستەن كەيٸن قالا شەتٸندەگٸ «قازانات» اتشابارىندا دٷبٸرلٸ بەيگە ۇيىمداستىرىلسا, كەشقۇرىم قالادا وتاندىق جەنە شەتەلدٸك ەسترادا جۇلدىزدارىنىڭ قاتىسۋىمەن ۇمىتىلماس كونتسەرتتٸك كەش ٶتكٸزٸلەدٸ.
.jpeg)