Qazaqstanda mamyrdyń alǵashqy kúni, iaǵni búgin jyldaǵy dástúr boiynsha birlik kúni atalyp ótedi, - dep habarlaidy "Ult aqparat".
Kez kelgen merekeniń óz tarihy bar. Sol sekildi birlik kúniniń de merekeler qataryna qosylýynyń tarihy osydan 130 jyl burynǵy oqiǵalarmen tikelei bailanysty. Mereke áý basta 1889 jyldan bastap Eńbekshilerdiń yntymaqtastyǵy kúni retinde atalyp óte bastaǵan. 1886 jyldyń 1 mamyrynda AQSh-ta jumysshylar 15 saǵattyq jumys kúnine qarsy ereýil uiymdastyryp, jumys kúnin 8 saǵat dep belgileýdi talap etken eken. Ereýilge qatysqan jumysshylar tutqyndalyp, kisi shyǵyny da tirkeledi. Alaida 1889 jyldyń maýsymynda Parijdegi 2 Internatsionaldyń 1 Kongressi 1 mamyrdy - 8 saǵattyq jumys kúni úshin Halyqaralyq kúres kúni nemese Eńbekshilerdiń halyqaralyq yntymaqtastyq kúni dep ataý týraly sheshim shyǵarǵan.
Qazaqstan Respýblikasy Tuńǵysh Prezidenti – Elbasy Nursultan Nazarbaevtyń Jarlyǵyna sáikes birlik kúni elimizde 1996 jyldan bastap atap ótiledi. Qazaqstan halqynyń birligi merekesin jańa turpatta toilaý qajettigin, ony elimizdiń basty merekesine ainaldyrý ideiasyn da Elbasy kótergen bolatyn.
Kóptegen ulttyń ortaq shańyraǵyna ainalǵan Qazaqstan beibitshilik pen kelisim arqyly álemge úlgilik joldy nusqap keledi. Áitse de, ultaralyq kelisim men dinaralyq tatýlyqtyń altyn besigin terbetý aiaq astynan týyndaǵan nemese qazaq dalasynda ózdiginen paida bolǵan dúnie emestigi beseneden belgili. El iesi, jer iesi sanalatyn qazaq halqy almaǵaiyp zamandarda shartaraptan bas saýǵalaǵan, taǵdyr tálkegimen bosyp kelgen basqa jurtty baýyryna basty. Óziniń toz-tozy shyqqanyna qaramastan, basqanyń qaiǵysyna da ortaqtyǵyn tanytty. Keńestik júie qyspaǵymen qazaq dalasyn panalaǵan bóten jurt osynda máńgilik turaqtap qaldy. Táýelsizdik tusynda da qyryqjamaýdai bolǵan ulttyq quramdaǵy osy erekshelikti negizge alǵandar «jańadan paida bolýy yqtimal úlken qaqtyǵystar alańy» retinde qazaq dalasyn meńzegen edi. Alaida qazaq halqynyń danalyǵy, keńdigi men syilastyǵy etnostyq tegine, áleýmettik, dini jáne de shyǵý tegine qaramai, jańa memlekettiń barsha azamatynyń uiysýyna sebepshi boldy
Qazaqstan ózge memleketterdei ulttyq óktemdikti tanytyp otyrǵan joq. Birlikti tý etip, etnostardyń quqyǵyn qorǵaýda usaq ulttarǵa ózge elderde joq jeńildikterdi kórsetip keledi. Ýkrain nemese uiǵyr tilindegi mekteptiń bolýy, korei men ózbek teatrlarynyń jumys istep turýy - soǵan dálel. Iaǵni, azshylyq ulttyń mádenietin, tilin saqtaý mindetin memlekettiń ózi moinyna alyp otyr.
Bizdiń elimizdegi 88 mektepte ózbek, tájik, uiǵyr, ýkrain tilinde ótedi. Al 108 mektepte Qazaqstan etnostarynyń 22 tili jeke sabaq retinde oqytylady. Elimizde 15 tildegi 35 baspasóz bar. Telearnada 11 tilde baǵdarlama shyǵyp jatyr. 14 orys teatry bar. Ózbek, uiǵyr jáne korei teatrlary jumys istep tur. Nursultan Nazarbaev aitpaqshy «mundai tek bizdiń elde ǵana bar».
Jyldaǵy dástúr boiynsha birlik kúni Nur-Sultan men Almatyda, barlyq oblys ortalyǵy men aýdan-aýyldarda sherýler men festivaldar ótip jatatyn. Alaida biyl koronavirýs infektsiiasy búkil álem halqyn áýre-sarsańǵa salyp, qalypty ómirge úlken yqpalyn tigizgenine kýá bolyp otyrmyz. Áitse de Qazaqstan halqy búgingi kúni sabyr men yntymaqqa tór berip, qiyndyqty eńserip keledi. Halyqtyń sabyry men túsinigi, nieti bir jerden shyǵyp, koronavirýs indetine qarsy jumylyp otyr. Ornyndaǵy is ońalyp, elge qalypty ómirge qaityp keletin ýaqyt da taqap qaldy. Bul – birliktiń arqasy, eldiktiń belgisi.
Birlik kúni qutty bolsyn!
