Musylman qaýymy úshin kúnderdiń qaiyrlysy - juma bolsa, túnderdiń qaiyrlysy - Qadir túni. Biyl bul qasietti tún mamyrdyń 31-inen maýsymnyń 1-ine qaraǵan túnine sai kelip otyr.
Dini nanym boiynsha, Qadir túni - saýaptar eselenip jazylatyn erekshe tún. Sebebi, bul túni «qasietti Quran Kárimniń aiattary túse bastaǵan».
«Qadir» sózi «abyroi, ulylyq, orasan zor» maǵynasyn beredi. Sebebi, Qadir túni - ulyq jáne asa qasietti kesh bolyp sanalady. Bul túnniń salmaǵy myń aidan da qaiyrly. Quran Kárimde bul týrasynda «Qadir túni myń aidan da qaiyrly», (Qadir, 2) - dep baiandalady». QR Musylmandary dini basqarmasy «Qadir» sózine qasietti Quran súrelerinen úzindiler keltire otyryp, osyndai anyqtama beredi.
Din ókilderiniń aitýynsha, osy túni Jaratýshyǵa (s.ǵ.s.) bar yqylasymen syiynǵan pende ǵumyr boiy qulshylyq etken bolyp sanalady. Al árbir jyl saiynǵy Qadir túnin yjdahatpen kútip, qulshylyq qylǵan jandar qamshynyń sabyndai qysqa ǵumyrda saýaptan biik taý turǵyza alady dep esepteledi.
Qadir túniniń qut-berekesi sheksiz. Qazaq taqýalary tań aǵaryp atqanǵa deiin perishteler sálemeti jer betine sebezgilep, musylman úmbetiniń júregine tynyshtyq pen jan rahat ornaidy dep támsildegen. Bul túnde ózin musylman sanaityn árbir jan ǵibadat jasap, imani sezimderin arttyrýy kerek.
Islam ǵulamalary Qadir túnine «Beibitshilik túni» degen baǵa da beredi. Al din ókilderi bul túndi meilinshe qulshylyqpen, uiqysyz, duǵa jasap ótkizýge keńes beredi. Meshitke baryp, kieli túndi jamaǵatpen birge qarsy alýdyń da óz nyǵmetteri bar.
Eske salaiyq, biyl 6 mamyr kúni bastalǵan Oraza aiy 4 maýsym kúni aiaqtalady. 5 maýsymda Oraza aittyń alǵashqy kúni. Bekitilgen pitir-sadaqa kólemi - bir adamǵa 300 teńge.
