Búgin Qazaqstanda shamamen 380 myńǵa jýyq oqýshy birinshi synypqa barady. Respýblikanyń barlyq bilim oshaqtarynda alǵashqy qońyraý soǵyldy, dep habarlaidy "Ult aqparat".
Aita keterligi, 1 qyrkúiek Qurban ait meiramyna dál kelgendikten alǵashqy qońyraý soǵý saltanaty 2 qyrkúiekke aýystyrylǵan bolatyn.
Jalpy jyldan jylǵa birinshi synypqa baratyn búldirshinderdiń sany arta túsýde. Ótken jyly mektep tabaldyryǵyn 370 myńǵa jýyq bala attasa, biyl olardyń sany 10 myń balaǵa artqan. Osyǵan bailanysty elimizdiń barlyq óńirlerinde jańadan mektepter salynyp jatyr. Biyl 75 jańa mektepti paidalanýǵa berý josparlansa, sonyń 35-i 2 qyrkúiek kúni oqýshylarǵa esigin aiqara ashady. Munan bólek, 300 mektepke kúrdeli jóndeý, al 410 mektep aǵymdyq jóndeý jumystary júrgizildi.
Esterińizde bolsa, ótken jyly elimizdiń 1 synyp oqýshylary jańartylǵan bilim berý baǵdarlamasymen oqi bastaǵan bolatyn. Al biyl 2, 5 jáne 7 synyp oqýshylary jańartylǵan bilim baǵdarlamasyna kóshedi.
