- Búgin Qazaqstannyń Tuńǵysh Prezidenti Nursultan Nazarbaevtyń alystaǵy aǵaiynnyń elge kelýine múmkindik jasap, «Qazaq kóshine» jol ashqan kún. Biyl El táýelsizdigi men Elbasy tiegin aǵytqan Uly kóshke - 25 jyl tolyp otyr. 1991 jyly 18 qarashada Qazaq KSR Joǵarǵy Keńesiniń sheshimine sáikes respýblikanyń Ministrler kabineti «Aýyldyq jerlerde jumys isteýge tilek bildirýshi baiyrǵy ult adamdarynyń basqa respýblikalardan jáne shet elderden Qazaq KSR-yna kóship kelýi tártibi men sharttary týraly» qaýly qabyldady, dep habarlaidy Ult.kz tilshisi QazAqparat agenttigine silteme jasap.
20 tarmaqtan turatyn ol qaýlyda basqa respýblikalardan jáne shetelderden Qazaqstannyń aýyldy jerlerine jumys isteýge tilek bildirýshi baiyrǵy ult adamdaryn Qazaq KSR-ine qalai ákelýdiń tetikteri men joldary, aýyldy jerge kóship kelgen soń olardy qujattandyrý, sondai-aq áleýmettik, dárigerlik, bilim berý, turǵyn úi, jańa ortaǵa beiimdeý syndy tolyp jatqan máseleler boiynsha jeńildikter men kómekter usyný egjei-tegjeili qarastyrylǵan. Mysaly, qaýlynyń 5-tarmaǵynda «Halyq depýtattary jergilikti keńesteriniń atqarý komitetterine, agroónerkásip kesheniniń kásiporyndary men uiymdaryna basqa respýblikalardan jáne shetelderden qonys aýdarǵan baiyrǵy ult adamdaryn turǵyn-jaimen qamtamasyz etý maqsatynda jekelegen azamattardyń respýblikadan ketýi nátijesinde bosaǵan úilerdi nemese páterlerdi satyp alý usynylsyn» delingen. Sodan bergi shirek ǵasyr ýaqytta Atajurtqa oralǵan qandastarymyzdyń sany 1 millionnan asty. Bul, árine, Elbasy Nursultan Ábishulynyń eń jemisti saiasaty desek qatelespeimiz. Óitkeni, kez-kelgen memleket úshin basty qundylyq - halyq. Ata zańymyzda da memlekettiń eń basty bailyǵy - halyq, árbir azamat ekeni taiǵa tańba basqandai jazylǵan. Qudaiǵa shúkir, bul kúnde qazaq ultynyń úlesi 70 paiyzǵa jaqyndap otyr. Bul elimizdiń tutastyǵy men qaýipsizdigin bekemdeýde, bereke-birligin nyǵaitýda erekshe ról atqaratyny belgili.
Aita keterligi, osyndai ataýly kúnge orai jaqynda aqyn Aýyt Muhibekuly Úkimetke «Qazaqstan Respýblikasyndaǵy merekeler týraly» 2001 jylǵy 13 jeltoqsandaǵy №267-II Zańnyń 3-babyna tolyqtyrý engizip, 18 qarashany «Ulttyq kóshi-qon kúni» etip bekitý» týraly bastama kótergen bolatyn. Buǵan deiin bul kún ataýsyz ótilip kelgen edi. Sonymen qatar, biyl qazaq tarihyna altyn árippen jazylýǵa tiis osy mereili merekeni elge oralǵan aǵaiyn búgin 18 qarashada Almatydaǵy Stýdentter saraiynda «Kósh jáne Kóshbasshy» atty merekelik kontsertpen airyqsha atap ótpek.
Sharaǵa QR Aqparat jáne kommýnikatsiialar ministri Dáýren Abaev qatyspaq. Keshte «Kósh jáne Kóshbasshy» atty derekti film kórsetiledi jáne elge oralyp jetistikke jetken qandastarymyzdyń qazirgi ómiri týraly beinesiýjet usynylmaq. Sonymen birge Qazaqstannyń estrada juldyzdary óner kórsetedi dep kútilýde.
Táýelsiz Qazaqstan úshin sol «Azamattyq qujattandyrý týraly» №711 qaýly shyǵarylǵan 18 qarasha óte mańyzdy tarihi kún dep eseptelýi tiis. Óitkeni, bes qurlyqqa tarydai shashyrap ketken qandastarymyzdyń basynyń óz Otanynda birigýi osy kúnnen bastaldy. Sondai-aq, bul qaýlynyń 1997 jyly 13 jeltoqsanda tuńǵysh ret qazaq tilinde qabyldanǵan, 2011 jyly 22 shildede, 2013 jyl 15 jeltoqsanda jáne 2015 jyly 24 qarashada Parlamentte úsh ret ózgerister men tolyqtyrýlar engizilip, qazir qoldanystaǵy «Halyqtyń kóshi-qony týraly» Zańdy túzýge túpnegiz bolǵanyn da aita ketýimiz kerek.
.jpeg)