15 qarasha - aqyn, jazýshy, dramatýrg Beiimbet (Bimuhamed) Jarmaǵambetuly Mailinniń týǵan kúni, dep habarlaidy "Ult aqparat".
Beiimbet Mailin 1894 jyly Qostanai oblysynda týǵan. Arǵynbai qajynyń medresesinde, Qostanaidaǵy orys-qazaq mektebinde, Ýfadaǵy Ǵaliia medresesinde, Troitsk qalasyndaǵy Ýázifa medresesinde oqyǵan.
1923-1925 jyldary Qostanai gýberniialyq «Aýyl» gazetinde, 1925-1928 jyldary «Eńbekshi qazaq» gazetinde, 1928-1932 jyldary respýblikalyq «Aýyl tili» gazetinde ádebi qyzmetker, redaktor boldy. 1932-1937 jyldary - «Sotsialistik Qazaqstan» gazetiniń bólim meńgerýshisi, redaktordyń orynbasary, «Qazaq ádebieti» gazetiniń bas redaktory qyzmetterin atqarǵan.
Ýfadaǵy Ǵaliia medresesinde oqyǵan jyldary tatardyń Ǵ.Ibragimov, M.Ǵafýri syndy aqyn-jazýshylarymen shyǵarmashylyq bailanysta boldy. Osy oqý ornyndaǵy «Sadaq» qoljazba jýrnalynda «Musylmandyq belgisi» atty tuńǵysh óleńi jaryq kórdi. Onyń alǵashqy shyǵarmalary - «Qostanai ýezi, Dambar bolysy» ocherki, «Muqtajdyq», «Kóńilime» atty óleńi, «Mal», «Shuǵanyń belgisi» povesi, «Bolǵan is» áńgimesi «Aiqap» jýrnalynda, «Qazaq» gazetinde jariialandy. «Kedeige», «Gúldense aýyl - gúldenemiz bárimiz», «Jazǵy jailaýda», «Naýryz túlegi», «Kók siyr», «Bizdiń jastar», «Myrqymbai», «Áit, shý... ala atym», «Qarasor», «Ber, Myrqymbai, qolyńdy!», «Ái, Myrqymbai», «Baidyń qyzy», «Ráziia qyz», «Qashqyn kelinshek», «Zaikúl», «Marjan», «Qandy kek», «Seksen som», «Kúlpash», «Talaq», «Qara shelek», «Aqtalǵan eńbek», «Sary ala ton», «Shapaidyń haty», «Arystanbaidyń Muqyshy», «Daýdyń basy - Dairabaidyń kók siyry», «Biǵaishanyń haty», «Ashtyq qurbany», «Soiqandy sodyrlar», «Kesindiler», «Alyptardy aralaǵanda», «Shuǵanyń belgisi», «Raýshan - kommýnist», «Azamat Azamatych», «Qyzyl jalaý», «Qońsylar», «Tartys» atty poemalar, feletondar, ocherkter, povester men romandardyń, 25 pesanyń, libretto men stsenariilerdiń avtory.
Beiimbet Mailin 1938 jyly jazyqsyz tutqyndalyp, saiasi repressiianyń qurbany boldy. Onyń áieli Gúljamal Mailina da qamaýǵa alynyp, QarLAG-qa jiberilgen.
2019 jyldyń 25 maýsymynda QR Prezidenti Qasym-Jomart Toqaevtyń Jarlyǵymen Qostanai oblysynyń Taran aýdany Beiimbet Mailin aýdany bolyp ózgerdi.
