Qytai býddisteri Qaýymdastyǵy tóraǵasynyń orynbasary Chýn I qazaqtyń uly aqyny Abai Qunanbaiulynyń óleńin mysalǵa keltirdi, dep habarlaidy QazAqparat tilshisi.
«Býddizmniń ilimi boiynsha barlyq adamdar bir-birine janashyrlyqpen qarap, zańdardy bir-birine qaishy qoimaýy tiis. Birlik degenimiz - adamnyń jany men táni birtutas bolýy kerek. Sol siiaqty jeke adam men qoǵam bir-birinen ajyramaýy tiis. Qaiyrymdylyqqa bet buryp, ádiletke erik bergen jaǵdaida ǵana biz adami qaǵidattardy túsine alamyz. Mine, býddizm iliminiń negizgi qaǵidattary osy», - dedi Chýn I Álemdik jáne dástúrli dinder kóshbasshylarynyń VI sezi aiasynda ótip jatqan «Jahandyq qaýipsizdik tujyrymdamasy retindegi «Manifest. HHI ǵasyr»» taqyrybynda ótken otyrysta.
Chýn Idiń aitýynsha, álemdegi dinderdiń bári ártúrli bolyp kelgenimen, olardyń adamǵa degen qamqorlyq barlyq dinderdiń túpqazyǵy.
«Ózińe tilemegendi ózgege tileme - Býdda bizge osyndai sabaq berdi. Iaǵni, óziń qandai baqytty bolǵyń kelse, ózgege de sondai jaqsylyq jasaýǵa tyrys degen maǵynany bildiredi. Barlyq mádenietter men dinderdiń úndeýi bir ǵana ortaq núktege túiisedi. Barlyǵy da adamnyń jaqsylyǵyna, baqýattylyǵyna negizdelýi tiis. Adasýdan alys bolǵanymyz abzal. Abai Qunanbaiuly «Aqyryn júrip, anyq bas, Eńbegiń ketpes dalaǵa» degendei árqaisymyz jaqsylyqty ózimizden bastaiyq. Búkil adamzattyń jarqyn bolashaǵy - ár adamnyń jaqsylyq jasaýynan bastalady», - dedi Chýn I.
Eske sala ketsek, Álemdik jáne dástúrli dinder kóshbasshylarynyń VI sezi Astanada keshe bastalǵan bolatyn. Alqaly jiynǵa barlyq álemdik jáne dástúrli dinderdiń ókilderi, sonymen qatar bedeldi dini liderler, saiasi qairatkerler men halyqaralyq uiym ókilderinen quralǵan 46 elden 82 delegatsiia qatysýda. Sezdiń mártebeli meimany - Serbiia Respýblikasynyń Prezidenti Aleksandr Výchich. Jahandyq sharanyń basty jáne negizgi taqyryby - «Dini liderler qaýipsiz álem úshin».
Sez barysynda Qazaqstan Prezidenti Nursultan Nazarbaev memleketter arasyndaǵy senimdi nyǵaityp, qaýipsiz álemdi qalyptastyrý jolynda konfessiiaaralyq, órkenietaralyq dialog ortalyǵyn bekitýge daiyn ekenin málimdegen edi.
