- «BTA Banki» AQ basqarmasy basshysynyń burynǵy orynbasary Jaqsylyq Jarymbetovtyń aitýynsha, osydan 8 jyl buryn bastalǵan qylmystyq is kezinde úrei-qorqynysh boldy. Sol sebepti Jarymbetov birden boi tasalap ketti. Al Ábiliazov úshin onyń elge oralǵany tiimsiz boldy, dep xabarlaidy Ult.kz tilshisi QazAqparat agenttigine silteme jasap.
«Shynymdy aitsam, men ózim qatty qoryqtym. Bul jaqta tergeýge túsken adamdy qinaidy, zorlyq-zombylyq kórsetedi, tipti óltiredi dep aitqannan keiin kez kelgen adam úreilenedi. Árine, Ábiliazovtyń ózi shoqty kósep otyrdy. Oǵan meniń osy jaqqa kelgenim tiimsiz boldy dep oilaimyn. Iá, sol kezde qorqynysh boldy. Men otbasym úshin, balalarym úshin alańdadym», - deidi Jarymbetov.
Onyń aitýynsha, bas kezinde ol Ulybritaniiada boi tasalap júrdi. Odan keiin Eýropany kezip, Túrkiiaǵa bardy. Aqsha jaǵynan Ábiliazovtyń nemese onyń adamdary kómektesti. Oǵan qosa, Jarymbetovtyń óz jinaqtary bolǵan.
Búginde «BTA Banki» AQ basqarma basshysynyń burynǵy orynbasary óz kinásin moiyndap otyr. Alaida ol qylmysty qasaqana jasadym dep sanamaidy. Sebebi sol kezde basshylyqtyń buiryǵyn oryndaýǵa týra keldi.
«Kez kelgen iste núkte qoiǵan durys qoi. Onsyz basqa adamdar qinalyp júre beredi. Buǵan deiin beimálim bolyp kelgen detaldardy ashý qajet. Ashyǵyn aitaiyn, qazirgi kezde men tergeýge kómek berýge kelistim. Osynyń arqasynda men buǵan deiin sottalǵan azamattardyń, shetelde áli kúnge deii qashyp júrgenderdiń jazasyn jeńildetýge óz septigimdi tigizemin dep senemin», - dep atap kórsetti Jarymbetov.
Aita keteiik, búgin Jarymbetov arnaiy baspasóz máslixatyn ótkizip, ózine qatysty taralyp jatqan alyp-qashpa áńgimelerdi joqqa shyǵardy. Onyń sózine qaraǵanda, qańtardyń 17-si kúni Túrkiianyń shekara qyzmeti ony jalǵan tólqujatpen júrgeni úshin ustaǵan bolatyn.
«Politsiia ýchaskesinde otyrǵanda men ózimniń shyn aty-jónimdi aittym. Sosyn Ystanbuldaǵy Qazaqstannyń resmi ókildiligine xabarlasýdy ótindim. Sóitip, qańtardyń 20-sy kúni meni Qazaqstanǵa ekstraditsiialady. Ertesinde meni tergeý abaqtysyna qamady. Osy ýaqytqa deiin sonda boldym. Maǵan eshqandai zorlyq-zombylyq pen qysymnyń jasalmaǵanyn málimdegim kelip otyr», - deidi ol.
