Aqtóbege Astanadan 200-den astam maman kelip, ekonomikalyq, áleýmettik, meditsinalyq, dini sala boiynsha monitoring júrgizgen bolatyn. Bul jumys óńirde taǵy bir aiǵa jalǵasady. «Halyq qaýipsizdigin qamtamasyz etý» jobasy aiasynda jergilikti mamandardan quralǵan jumys toby iske kiristi. Oblys ákimi Berdibek Saparbaev ekstremistik jáne terroristik qyzmetterdiń qarjylandyrý kózderin anyqtaýdy tapsyrdy. Bul týraly «Aqtóbe aqparat» ortalyǵynan málimdedi, dep habarlaidy Bnews.kz tilshisi.
«Halyq qaýipsizdigin qamtamasyz etý» jobasyn jalǵastyrý úshin jergilikti mamandardan quralǵan jumys toby iske kiristi. Áiteke bi, Baiǵanin, Yrǵyz, Qarǵaly, Qobda, Mártók, Oiyl aýdandarynda 156 sarapshy jumys isteitin bolady. Sebebi, 29 qyrkúiek pen 28 qazan kúnderi júrgizilgen monitoring kezinde bul aýdandar qamtylmai qalǵan. Ózge alty aýdandaǵy jumys 10 qarashada bastalyp, 10jeltoqsanda aiaqtalady»,- dep habarlaidy «Aqtóbe aqparat» ortalyǵy.
Sonymen qatar, oblys ákimi Berdibek Saparbaev ekstremistik jáne terroristik qyzmetterdiń qarjylandyrý kózderin anyqtap, jolyn kesýmen ainalysatyn jumys tobynyń da qurylatynyn málim etti.
«Oblysymyzǵa Astanadan kelgen top 30 kún ishinde Aqtóbe qalasy men 5 aýdanda úlken jumystar atqardy. Eń bastysy, biz birlese otyryp jumys isteýimiz kerek. Atalmysh toptyń mindeti tek kemshilikterdi kórý ǵana emes, basty qyzmeti olardy sheshýge baǵyttalýy tiis», - dedi Berdibek Saparbaev.
Eske salsaq, Elbasy tapsyrmasymen «Halyq qaýipsizdigin qamtamasyz etý» jobasy 29 qyrkúiek pen 28 qazan aralyǵynda uiymdastyryldy. Jergilikti atqarýshy organdardyń qoldaýymen top músheleri oblystyń 145 myń turǵynyn qamtityn 2,6 myń is-shara ótkizdi.
