Brent markaly munai baǵasy 2016 jyldan beri birinshi ret 32 AQSh dollarynan tómen quldyrap ketti, dep habarlaidy Finprom.kz.
Koronavirýstyń saldarynan álemdik ekonomika deńgeii 2 trln AQSh dollaryna azaiýýy múmkin. Saýda jáne damý boiynsha BUU konferentsiiasy óz baiandamasynda osyndai boljam jasap otyr.
Jalpy álemdegi turaqsyz ahýal eń iri eki munai óndirýshiniń arasyndaǵy túsinispeýshilikke ákep tiredi. Buǵan deiin habarlanǵanyndai, Venadaǵy OPEK+ múshe memleketteri ministrleriniń kelissózderi Resei men Saýd Arabiiasynyń kelisimge kele almaýy saldarynan tyǵyryqqa tirelgen. Artynsha 9 naýryzda Brent markaly munai baǵasy barreline 24,1 paiyzǵa – 34,36 AQSh dollaryna deiin tómendedi. Saýda barysynda munai 2016 jyldyń qańtarynan beri birinshi ret 31,02 AQSh dollaryna deiin quldyrady.
Osy jyldyń 10 jeltoqsanynda S&P Global Halyqaralyq reiting agenttigi 2020 jyly Brent markaly munai baǵasyna boljam jasap, ary ketkende munai barreli 40 AQSh dollaryna tómendeitinin boljaǵan edi. Áitse de agenttik biyl ortasha eseppen baǵanyń 60 AQSh dollary deńgeiinde saqtalatynyn alǵa tartqan.
Munai baǵasynyń quldyrap, dollar men eýro baǵamynyń qubylýy halyqaralyq birjalardyń indeksine aitarlyqtai jaǵymsyz sipatta yqpal etýde. Máselen eýropalyq birjalar dúisenbide quldyrap ketti. FTSE 100 London birjalyq indeksi 7,7 paiyzǵa, nemistiń DAX indeksi 7,9 paiyzǵa, frantsýzdyq CAC 40 8,4 paiyzǵa tómendedi.
Al Qazaqstan qarjy birjasyndaǵy KASE indeksi 2020 jyldyń 10 naýryzynda 4,7 paiyzǵa azaidy.
Bul oqiǵalar kóptegen memlekettiń úkimetterin eldegi ekonomikalyq jaǵdaidy sheshý úshin jedel sharalar qabyldaýǵa jeteledi. Máselen, baǵanyń turaqtylyǵyn saqtaý úshin Qazaqstan Respýblikasynyń Ulttyq banki bazalyq mólsherlemeni 12 paiyzǵa deiin kóterý týraly tótenshe sheshim qabyldady. Sonymen qatar, valiýta naryǵynyń turaqtanýyn jáne qarjylyq turaqtylyqty qamtamasyz etý úshin Ulttyq bank qajetti valiýtalyq interventsiialardy júzege asyrady. Ol úshin elde valiýtalyq aktiv jetkilikti mólsherde bar. Bul sharalar infliatsiianyń jedeldeýin shektep, ulttyq valiýtanyń shamadan tys qubylýyna jol bermeidi.
