Brent munaiynyń baǵasy 2020 jyldyń 7 qańtarynan bastap alǵash ret ICE London birjasyndaǵy saýda-sattyqta barreline $61,02-ǵa jetti, dep habarlaidy TASS agenttigi.
Londondaǵy ICE birjasynda Brent markaly munaidyń sáýir aiyndaǵy fiýchersteriniń baǵasy 0,76%-ǵa ósti jáne barreline 61,02 dollarǵa jetti, delingen Máskeý ýaqytymen 05:14-tegi saýda alańynyń málimetterinde.
Sońǵy ret Brent baǵasy 2020 jyldyń 7 qańtarynda qara altyn barreline 61 dollardan asqan bolatyn.
Aita keteiik, munaidyń bir barreli sońǵy bir jyldan astam ýaqyt ishinde alǵash ret 60 dollardan asty. Investorlar koronavirýs indetinen zardap shekken ekonomika kútkendegiden áldeqaida jyldamyraq qalpyna keler dep úmittenedi. 8 aqpanda Brent markaly munaidyń bir barreli 1,26 paiyzǵa qymbattap, London birjasynda 60,19 dollardan satyldy. Bul - byltyrǵy qańtar aiynan bergi eń joǵary kórsetkish.
Álemdegi iri munai importtaýshy elderdiń biri Qytaidyń munaiǵa suranysy artyp, pandemiiaǵa deiingi kezeńdegidei shikizat tutyna bastaǵan shaqta jáne álem elderi koronavirýsqa qarsy vaktsinany jappai paidalanyp, munai óndirýshi elder shikizat kólemin shektep óndirip jatqan shaqta munai baǵasy ósip otyr.
Koronavirýs indeti munai salasyn daǵdarysqa ushyratyp, byltyr "qara altyn" quny nólden tómendep ketken edi, munai qory 1 milliard barrelden asqan. Biraq sáýir aiynda munai óndirý kólemin qysqartýǵa kelisken OPEK músheleri, Resei jáne ózge de munai óndirýshi elder 2,1 mlrd barrelden asyrmai munai óndirip, shikizat qorynyń azaiýyna yqpal etken.
Aziia naryǵynda munaiǵa suranys deńgeii "qara altynnyń" baǵasyna áser etetin iri faktorlardyń biri. Ekonomikasynyń iriligi jaǵynan álemde ekinshi orynda turǵan, iri munai importtaýshy Qytaidyń koronavirýs indetin tejei alýy ekonomikanyń jyldamyraq jandanýyna múmkindik berdi. Alaida munaiǵa suranys deńgeii pandemiiaǵa deiingi kezeńmen salystyrǵanda áli tómen kúide qalyp otyr. Kóptegen elderde koronavirýspen bailanysty adam ólimi kóp, biznes karantinnen áli zardap shegip jatyr.
