Braziliialyq jáne ispaniialyq ǵalymdar birneshe minýt ishinde koronavirýsty beitaraptandyratyn mata jasap shyǵardy, dep habarlaidy "Ult aqparat" Agencia Brasil basylymyna silteme jasap.
Braziliiadaǵy San-Paýlý ýniversiteti janyndaǵy Biomeditsina ǵylymdary institýty, Ispaniiadaǵy Jaýme I ýniversiteti jáne Braziliiadaǵy fýnktsionaldyq materialdardy ázirleý ortalyǵynyń ǵalymdary koronavirýs infektsiiasyn týǵyzatyn SarS-CoV-2 virýsyn birneshe minýtta beitaraptandyratyn mata jasap shyǵardy.
Jobaǵa Nanox nanotehnologiia kompaniiasy da qosyldy.
Ǵalymdardyń aitýynsha, mata jańa koronavirýstyń 99,9%-yn shamamen eki minýttyń ishinde beitaraptandyrady. Mata aýrýhanaǵa arnalǵan kiimdi daiyndaýǵa paidalanylady jáne jaqyn arada satylymǵa shyǵady.
Matanyń quramyna poliester men maqta, sonymen qatar kúmis mikrobólshekteriniń qabaty kiredi. Usaq kúmis bólshekterin qoldaný burynnan bar ádis. Ol toqyma, kosmetika, lak-boiaý ónerkásibinde paidalanylatyn.
Biomeditsina ǵylymdary institýtynyń 3-shi dárejeli bioqaýipsizdik zerthanasynyń zertteýshisi Lýsio Freitas Agência Brasil agenttigine matanyń tiimdiligi Braziliiada koronavirýs juqtyrǵan alǵashqy naýqastardyń birinen alynǵan jańa koronavirýs úlgisin paidalanyp tekseristen ótkenin habarlady.
Matanyń shynynda tiimdi ekenine kóz jetkizý úshin ǵalymdar molekýlalyq taldaýdyń ekinshi kezeńin ótkizdi. Ónimdi satylymǵa shyǵarmas buryn ǵalymdar matanyń virýsqa qarsy, antimikrobtyq jáne sańyraýqulaqtarǵa qarsy qasietinen bólek allergiia jáne basqa da aǵzanyń keri áserin týyndatpaitynyn tekserdi.
