Qazaqstanda brakonerlikpen kúresti kúsheitý jónindegi zańnamalyq normalar Parlamentke osy aida engiziledi, dep habarlaidy QazAqparat.
«Brakonerlik qylmys úshin jaýapkershilikti kúsheitý kerek. Qazirgi ýaqytta brakonerlik uiymdasqan qylmys sipatyn alyp, tabiǵatty qorǵaý týraly zańnamanyń óreskel buzylý faktileri jyl saiyn kóbeimese, azaiatyn emes. Biyl tirkelgen «Ohotzopromnyń» eki inspektorynyń ólimi, Marqakóldegi brakonerlerdiń qylmystyq áreketteri, Kaspii teńizindegi bekire tuqymdas balyqtarǵa jasalǵan brakonerlik osy sózimizge aiqyn dálel bola alady. Osyǵan bailanysty, Memleket basshysy brakonerlik úshin jaýapkershilikti kúsheitý úshin naqty sharalardy qolǵa alýdy tapsyrdy», - dedi Qazaqstan Respýblikasynyń ekologiia, geologiia jáne tabiǵi resýrstar ministri Maǵzum Myrzaǵaliev vedomstvoda ótken alqa otyrysta.
Ministrdiń aitýyna qaraǵanda, atalǵan baǵytta jumys bastalyp ketken. Iaǵni, brakonerlik maqsatta paidalanylǵan qarýlardy, kerek-jaraqtardy mindetti túrde tárkileý erejeleri zańnamaǵa ózgeris retinde engizilgeli otyr.
«Sol sekildi, brakonerlik úshin sanktsiia kúsheitildi. Inspektorlardyń ósimdik jáne janýarlar álemin qorǵaý baǵytyndaǵy quzireti artty. Sonymen qatar, ministrlik Bas prokýratýramen jáne ózge de jaýapty organdarmen birge brakonerlikpen kúresti kúsheitý sharalaryn qolǵa alýda. Bul rette qyzmettik boryshyn óteý kezinde qoryqshylardyń nemese olardyń týystarynyń ómirine qastandyq jasaý qylmysyna sanktsiialar kúsheitildi», - dedi ol.
Maǵzum Myrzaǵaliev bul usynystar Bas prokýratýranyń janyndaǵy quqyqtyq saiasat jónindegi keńeste qoldaý tapqanyn baian etti.
«Májiliske zań jobasy osy aida engiziledi», - dedi ministr.
