«Bozjyra» qoǵam men mamandardyń oi-pikiri eskerile otyryp júzege asyrylady. Bul týraly Mańǵystaý oblysynyń ákimi Serikbai Trumov Ortalyq kommýnikatsiialar qyzmetinde ótken brifingte málim etti.
Onyń aitýynsha, koronavirýs pandemiiasy - álemde týristik saladaǵy jaǵdaidyń kúrdelenýine qaramastan, ishki týrizmniń ósýine aitarlyqtai yqpal etti.
«Biyl teńiz jaǵalaýynda bes juldyzdy qonaqúidiń ashylýymen, óńirge kelgen týrister sanynyń artqanyn baiqap otyrmyz. Kelgen saiahattaýshylar Mańǵystaýdyń tabiǵi jerlerin de aralap, ásirese Bozjyra shatqalyna qyzyǵýshylyq tanytýda. Bozjyraǵa tek tamyz-qazan aralyǵynda 2 myńǵa jýyq adam barǵan. Keler jyly bul san 5 ese ósedi degen boljam bar. Týristerdiń qoryqqa beibereket baryp, ózdiginshe júrýi – tabiǵatqa orasan ziian keltirýde. Sondyqtan Bozjyraǵa baratyn jol salyp, týristerdiń jaily demalýyna jaǵdai jasaýymyz kerek. Prezident te osy jaǵdaiǵa bailanysty pikirin bildirip, ekotýrizmdi órkenietti jolmen damytýdy qoldaitynyn aitty. Memleket basshysy tapsyrǵandai, bul joba sarapshylardyń, qoǵamdyq keńester men jaýapty sala jetekshileriniń oi-pikirleri eskerile otyra júzege asyrylady», - dedi S. Trumov.
Bozjyra aýmaǵynda safari-otel salý ideiasyn «Rixos» qonaqúi keshenin iske qosqan investorlar usynǵan. Qazir jobalaý jumystary júrip jatyr. Investor Bozjyradaǵy qonaqúidi shatqaldan 2 shaqyrym jerde salýdy usynyp otyr. Jobasy daiyn bolǵan soń qoǵam talqysyna usynylady.
«Bile bilsek, bul – bizge berilip turǵan zor múmkindik. Iri investor el týrizmin damytýǵa mol qarjy quiǵaly otyr. Munaiǵa ǵana táýeldi – bolý bolashaq úshin qaýipti. Kóp eldiń tájiribesi kórsetip otyrǵandai týrizmdi damytý arqyly, ekonomikamyzdy órkendete alamyz. Shaǵyn jáne orta biznestiń damýyna, jergilikti azamattardyń jumyspen qamtylýyna jol ashamyz. Qurmetti azamattar, jýrnalister, men de óz elimniń patriotymyn, týǵan jerimniń janashyrymyn. Azamattarymyz tabys taýyp, jaǵdaiyn jaqsartyp jatsa – qýanamyn», - dedi Mańǵystaý oblysynyń ákimi.
