Qashaǵannan munai óndirý kólemin shekteý týraly sóz múldem bolmaýy tiis. Bul týraly Úkimet otyrysynan keiingi brifingte QR Energetika ministri Qanat Bozymbaev málim etti, dep habarlaidy "Ult aqparat".
«Bizdiń úlesimiz tym az. Egerde, álemde táýligine 34 mln. barrel munai óndirilse, ondaǵy Qazaqstannyń úlesi ne-bári 1,5 mln. barrel ǵana. Bizdiń (munai óndirý kólemin) qysqartqanymyz nemese arttyrǵanymyz aitarlyqtai úlken ról oinamaidy», - dedi Bozymbaev BAQ ókilderiniń saýalyna orai.
Ministrdiń deregine sáikes, álemde munai óndirý kólemi boiynsha aldyńǵy orynda Saýd Arabiiasy men Resei Federatsiiasy kele jatyr.
«Mine, osylar bir sheshimge kelýi tiis. Olardyń árqaisysy táýligine 10 mln. barrelden astam munai óndiredi. Olar ózderiniń kesimdi pikirlerin bidirýi tiis, barlyq óndiriletin kólemniń 60 paiyzdan astamy osy elderge tiesili. Munan bólek, táýligine shamamen 4 mln. barrel óndiretin Iran, Parsy shyǵanaǵynyń ózge de elderi, Braziliia, Meksika bar. biz kelissózderdiń barlyǵyna da baiqaýshy retinde qatysýdamyz», - dedi ministr.
Sonymen birge Bozymbaev 28 qyrkúiekte Qashaǵannan munai óndirý bastalǵanyn eske salyp ótti.
«Qashaǵannan munai óndirý kólemin shekteý týraly múldem sóz bolmaýy tiis. Óitkeni, mindetteme bar, kóp qarjy salyndy, muny eshkim de shektemeidi», - dedi ol.
.jpeg)