AQSh federaldy apeliatsiialyq soty 2013 jylǵy Boston marafonyndaǵy jarylys úshin sottalǵan Djohar Tsarnaevty ólim jazasyna kesý týraly úkimdi joidy.
31 shilde kúni AQSh-taǵy birinshi okrýgtiń apelliatsiialyq soty Djohar Tsarnaevtyń úkimindegi barlyq derlik aiypty kúshinde qaldyrdy, biraq jazanyń qandai bolatynyn qaita anyqtaý úshin isti okrýg sýdiasyna joldady.
2013 jyly 15 sáýirdegi marafon kezinde Tsarnaev aǵasymen birge máre syzyǵynyń mańynda jarylys jasap, úsh adamdy óltirgen, 260-tan astam adamdy jaraqattaǵan. Djohar Tsarnaevtyń aǵasy Tamerlan tórt kúnnen keiin politsiiamen atysta qaza tapqan. Al Djohar Tsarnaevtyń ózi eki jyldan keiin 2015 jyly ólim jazasyna kesilgen.
Ol qoldan jasalǵan eki jarylǵysh zatyn ornatty, politsiia qyzmetkerin óltirdi degen aiyptar boiynsha kináli dep tabyldy. Úkim shyǵarylar kezde Tsarnaev taǵylǵan aiyptardy moiyndady.
Apeliatsiialyq shaǵymdy qaraǵan sýdialardyń úsheýi de ólim jazasyna kesý týraly úkimniń joiylý kerek dedi. Biraq sýdia Rodjer Tompson Tsarnaevtyń "ómir boiy túrmede otyratynyn, másele onyń ólim jazasyna kesilý-kesilmeýinde" ekenin aitty.
Bostandaǵy jarylys úshin aiyptalǵandardyń qatarynda qazaqstandyq stýdentter de bolǵan. Tsarnaevpen Dartmýt ýniversitetinde birge oqyǵan Dias Qadyrbaev pen Azamat Tájaiaqov "Tsarnaevtyń jarylysqa qatysy bar ekenin dáleldeitin aiǵaqtardy joiýǵa tyrysty" dep aiyptalyp, birinshisi alty jylǵa, ekinshisi úsh jarym jylǵa sottalǵan. 2016 jyldyń jazynda Azamat Tájaiaqov jazasyn ótep Qazaqstanǵa oraldy. Dias Qadyrbaev 2018 jyly merziminen buryn bosatylyp, Qazaqstanǵa deportatsiialandy.
