Ispaniia quramasynyń jáne «Atletik» klýbynyń jartylai qorǵaýshysy Niko Ýiliams fýtboldan álem chempionatynda jeńip alǵan altyn medalin anasyna tartý etti, dep habarlaidy ult.kz.
Fýtbolshynyń bul áreketi onyń otbasynyń aýyr taǵdyryn eske saldy. Nikonyń ata-anasy 1990-jyldardyń basynda jaqsy ómir izdep, Ganadan Ispaniiaǵa kóshken. Sol kezde anasy júkti bolǵanyna qaramastan, ekeýi bosqyndarǵa lyq toly júk kóliginde jol júrip, keiin birneshe kún boiy Sahara shólin jalańaiaq kesip ótken.
Olar aptap ystyqta, azyq-túlik pen sýsyz, qaraqshylar men adam saýdagerleriniń qaýpine qaramastan joldy jalǵastyrǵan. Osy aýyr sapardan keiin ákesiniń aiaq tabandary sezimtaldyǵyn joǵaltqan.
Ispaniiaǵa jetkennen keiin otbasy shekara qorshaýynan asyp ótip, biraz ýaqyt qamaýǵa alynǵan. Keiin olarǵa bosqyn mártebesi berilip, arada birneshe ai ótkende tuńǵysh uldary Iniaki dúniege kelgen. Segiz jyldan soń Niko ómirge keldi.
Ata-anasy otbasyn asyraý úshin birneshe jumysty qatar atqarǵan. Úlken aǵasy Iniaki inisine qamqor bolyp, qolynan kelgenshe kómektesken. Ýaqyt óte kele aǵaiyndy Ýiliamstardyń fýtboldaǵy jetistigi otbasynyń ómirin túbegeili ózgertti.
Iniaki «Atletik» klýbynyń kóshbasshylarynyń birine ainalsa, Niko Eýropa jáne álem chempiony atandy. Marapattaý rásiminen keiin Niko Ýiliams tribýnaǵa kóterilip, álem chempionatynyń altyn medalin anasynyń moinyna taqty. Bul sát jankúierlerdiń erekshe yqylasyna bólendi.
