Kollaj: Ult.kz
Májilis depýtaty Murat Ábenov Shymkentte bolǵan eki rezonansty oqiǵaǵa — Nuraidyń ólimi jáne 17 jastaǵy qyzdy alyp qashý oqiǵasyna bailanysty pikir bildirdi, dep habarlaidy Ult.kz.
Depýtattyń sózinshe "nekege turýǵa májbúrleý týraly" jańa bap qyrkúiek aiynda kúshine engen. Zań boiynsha urlaýshy kúsh qoldanyp, qandai da bir jaraqat salsa 10 jylǵa deiin bas bostandyǵynan aiyrylýy múmkin. Sonymen qatar qyz urlaýǵa qatysy bar barlyq adam óz jazasyn alýy tiis dep otyr ol.
"Bosaǵaǵa jatqan, úgittegender de jaýapkershilikke tartylýy kerek. Bul qyz zorlaýmen aiaqtalǵan bolsa, ol tipti qylmysqa sybailastyq. Ol ájelerdi sotqa tartý kerek. Áli kúnge deiin nege olar qamaýǵa alynbai jatqanyn túsinbeimin. Bul — toptyq qylmys, oǵan 8 jylǵa deiin bas bostandyǵynan aiyrý jazasy kózdelgen, ári qatysýshylardyń barlyǵy qylmystyq jaýapkershilikke tartylýy qajet", — degen Ábenov bul qylmysqa tosqaýyl bolmaǵan adamdardy da jaýapkershilikke tartý qajet ekenin aitty.
Murat Ábenovtyń aitýynsha qazirgi ýaqytta jynystyq zorlyq-zombylyqtyń jazasy qyz alyp qashý isine qaraǵanda jeńilirek, sondyqtan depýtat óz tarapynan osy zańdy qataitý boiynsha bastama kóteretinin jetkizdi.
"Qyz alyp qashýǵa — 10 jylǵa deiin jaza qarastyrylǵan, al jynystyq zorlyq-zombylyq isine — 3 jyldan 8 jylǵa deiin. Bul — úlken olqylyq. Men jaýapkershilikti kúsheitý bastamasyn kóterýge daiynmyn. Zorlaý — eń aýyr qylmystardyń biri. Men bul máseleni Parlamenttegi áriptesterimmen talyqylaýǵa shyǵaryp, Qylmystyq zańnamany ózgertýge kúsh salamyn", — dedi ol.
Eske sala keteiik, Shymkentte kámeletke tolmaǵan qyzdy beitanys er adam áieldikke alyp qashyp ketken. Úiine ákelgen soń, otbasyndaǵy egde jastaǵy áielder uialy telefonyn tartyp alyp, óz erkimen kelgeni týraly qolhat jazǵyzýǵa tyrysqan. Qyzdyń aitýynsha, alyp qashqan er adam ony jynystyq qatynasqa túsýge májbúrlegen. Artynsha ol qan bolǵan seisepti alyp ketip, basqa bólmede otyrǵan jeńgelerinen súiinshi surap, toilatyp ketken.Óz sózinde qyz quzyrly organdar eshteńe istemegenin, eshkimniń jaýapqa tartylmaǵanyn aityp, shaǵymdandy.
Oqi otyryńyz: Shymkentte 17 jastaǵy qyzdy alyp qashyp zorlaǵan: politsiia is qozǵady
Nurai Serikbaidyń qazasyna qatysty toqtalǵan depýtat stalking jáne kámelet jasyna tolmaǵandarǵa tiisý jaǵdailary jii nazardan tys qalyp qoiatynyn aityp otyr. Onyń aitýynsha áleýmettik jelilerdegi qýdalaý — qylmystyń alǵashqy satysy. Keiin stalking, iaǵni júieli túrde ańdý jáne qýdalaý áreketteri bolady. Shymkentte stalking deregi tirkelgenimen, bul boiynsha eshkim jaýapkershilikke tartylmaǵan. Ol mańyzdy ýaqyt joǵaltyldy dep esepteidi.
"Qyzdy qutqarýǵa bolar edi. Nuraidy qatty aiaimyn. Ata-anasy birneshe ret quqyq qorǵaý organdaryna júgingen, biraq Shymkent politsiiasy óz ýaqytynda shara qoldanbaǵan", — dep qynjyldy Murat Ábenov.
Ol sondai-aq stalkingke qatysty jańa zańnyń qyrkúiek aiynda kúshine engenin, biraq Shymkent qalasy men Túrkistan oblysynda túsindirý jáne aldyn alý jumystary is júzinde júrgizilmei otyrǵanyn jetkizdi.
"Mende olar osy túsiniksiz dástúrlerdi ishtei qoldaityndai áser qalyptasyp otyr", — dedi Ábenov.
Este bolsa, 21 jastaǵy Nurai Serikbai 11 qańtarda pyshaq jaraqatynan qaza tapty. Ol 2024 jyly tanysqan 28 jastaǵy Sherhan Aimahannyń stalkingine tap bolyp, oǵan turmysqa shyǵýdan bas tartqannan keiin birneshe ret ańdylyp, telefon men áleýmettik jeliler arqyly qysymǵa ushyraǵany aityldy. Qyz politsiiaǵa aryz bergenimen, organdar tiisti shara qoldanbaǵan, sońynda ol kóp qabatty úidiń aldynda pyshaq jaraqatynan qaza boldy.
